गोरखा कपमा चिट्ठामा आउडी कार

लन्डन । युके मोटर जोनले यसवर्षको गोरखा कपमा आउडी कार चिट्ठामा राख्ने भएको छ ।
तमुधिं यूकेको आयोजनामा २७ मेमा अल्डरसटस्थित क्वीन्स एभेन्यूमा हुने गोर्खा कपमा १० पाउण्डको चिट्ठा खरिदमा पाँच ढोके कार राखिएको हो । कम्पनीका प्रवन्धक विप्लब गुरुङले ‘नाफा कमाउनेभन्दा भन्दा पनि बजार विस्तारका हिसाबले सो योजना राखिएको’ बताए ।

गत साल पनि युके मोटर जोनले मिनी कुपर कार चिट्ठामा राखेको थियो । क्याबर्लीमा रहेको युके कार जोनले कार खरिद विक्री र मर्मत गर्ने गर्दछ ।

बेलायतमा नेपालीको सबैभन्दा वृहत जमघट रहने गोर्खा कप फुटबल प्रतियोगिता यस पटक १६ औं संस्करणका रुपमा आयोजना हुंदैछ । प्रतियोगितामा नन भेट्रानतर्फ वीनरले २५०० पाउण्ड पुरस्कार र ट्रफी पाउने आयोजकले जनाएका छन् । नन भेट्रानतर्फ रनरअपले १५०० पाउण्ड, भेट्रानतर्फ पहिलो विजेता टिमले १२०० पाउण्ड र सेकेन्डले ८०० पाउण्ड पाउने तमुधिं यूके अध्यक्ष ज्ञाम गुरुङले जानकारी दिए ।

गोर्खा कपमा ब्रिगेड व्याण्ड डिस्प्ले, प्यारासुट डिस्प्ले, पञ्चे बाजा, पाइपर, कल्चरल डान्स, खुकुरी डान्स, खानाका स्टल, हस्तकला सामाग्री, कमर्सियल र च्यारिटी स्टल आदि आकर्षण हुनेछन् ।

तमुधिं यूकेले टिम दर्ताका लागि आव्हान गर्दै टिम इन्ट्री २० मेसम्म खुल्ला रहेको जनाएको छ । म्याच ड्र र टिम घोषणा २० मेमा पत्रकार सम्मेलनमार्फत गर्ने कार्यक्रम छ ।