सिरियामा घातक हतियार प्रयोग भएको राष्ट्रसंघको आशङ्का

जेनेभा, स्वीट्जरल्याण्ड, १६ फागुन – सिरियाको गुटामा हालै सिरियाली सेनाको नेतृत्वमा भएको आक्रमणमा रासायनिक अर्थात मानवीय स्वास्थ्यमा समेत असर पार्ने खालका हतियार प्रयोग भएको आशंका संयुक्त राष्ट्रसंघले गरेको छ ।

यसअघि पनि सिरियाको विद्रोही नियन्त्रित भूभागमा सरकारद्वारा रासायनिक हतियार प्रयोग गरेको पाइएको भन्ने विभिन्न क्षेत्रबाट गुनासो सुनिएपछि यसबारे अनुसन्धान अघि बढाएको संयुक्त राष्ट्रसंघले जनाएको थियो ।

राष्ट्रसंघीय युद्ध अपराध अनुसन्धान अधिकारीले मङ्गलबार बताएअनुसार, गुटामा भएको व्यापक नरसंहारमा पनि यस्ता खालका हतियारहरू प्रयोग गरिएको हुनसक्छ ।

सिरियामा मानव अधिकारको अवस्था खोजविनका लागि राष्ट्रसंघीय आयोगले भनेको छ, ‘हामीले विद्रोही नियन्त्रित क्षेत्रमा रासायनिक हतियारको प्रयोग भएको भन्ने धेरै विवरण पाएका छौँ । यसबारे आयोगको ध्यानाकर्षण भएको र अनुसन्धान अघि बढाइएको छ ।’

क्लोरिन ग्यास प्रयोग भएको हतियार विद्रोही नियन्त्रित इदलिबको साराकेब तथा दौमाको पूर्वी गुटामा प्रयोग भएको विवरण आएपछि छानबिन शुरु गरेको राष्ट्रसंघको भनाई छ ।

‘यस विषयमा हामीले छिट्टै नै सत्यतथ्य बाहिर ल्याउने छौँ’- ती अधिकारीले भनेका छन् । सो नगरमा पछिल्लो हप्तामात्र भएको यस्तो हिंसात्मक हमलाका कारण सयौँ सर्वसाधारणको ज्यान गएको छ ।

युद्धविराम गर्न राष्ट्रसंघको पुनः आग्रह

संयुक्त राष्ट्रसंघ, १६ फागुन – यसैबीच सिरियाको राजधानी दमासकसको नजिकै रहेको यस गुटा नगरमा जारी आक्रमण अत्यन्तै क्रुर रहेको र यसबाट सयौँ सर्वसाधारण र बालिबालिका पनि परेको भन्दै संयुक्त राष्ट्रसंघले तत्कालै युद्धविरामको लागि पुनःआग्रह गरेको समाचार छ ।

उक्त क्षेत्रमा चार लाख सर्वसाधारण हिंसात्मक युद्धको चपेटामा परेका छन् । उनीहरुको उद्धारका लागि कुनै पहल सुरु भएको छैन । उनीलाई आवश्यक मानवीय सहायता पुरयाउन पनि सकिएको छैन ।

दमासकस र मस्कोको संयुक्त सहभागीतामा गुटा सहरमा भएको हिंसात्मक हवाई कारबाहीलाई स्थगित गरी कम्तीमा ३० दिनका लागि युद्धविराम गर्न संयुक्त राष्ट्रसंघको सुरक्षा परिषद्ले प्रस्ताव गरेको थियो ।

सुरक्षा परिषदमा भएको छलफलपछि तत्काल युद्धविराम गर्न संयुक्त राष्ट्रसंघका महासचिव एन्टोनियो गुथ्रेसले केही दिनमात्र अघि आग्रह गर्नु भएको थियो ।

महासचिव गुथ्रेसले युद्धले यहाँका नागरिकलाई आक्रान्त बनाएकोले यो अवस्थाको अन्त्यगरी सिरियाको पूर्वी गुटा क्षेत्रमा तत्काल युद्धविराम गर्न माग गर्नुभएको थियो । तर, राष्ट्रसंघको यो प्रस्ताव बमोजिम यहाँ युद्धविरामको लागि तयारी भने भएको छैन । बरु मङ्गलबारदेखि यहाँका विद्रोहीहरुमाथिको हमला दिनमा ५ घन्टाका लागि मात्र रोकिएको सिरियाली सेनाको भनाई आएको छ ।

विद्रोही नियन्त्रित उक्त क्षेत्रमा रुसी सहयोगका सरकारी फौजले आक्रमण जारी राख्दा उहाँको यस्तो टिप्पणी आएको हो ।