बेलायतका मगरहरूले गरे धुर्मुस सुन्तली फाउन्डेशनलाई आर्थिक सहयोग

लन्डन । मगर संघ युएचएसबी शाखाले धुर्मुस सुन्तली फाउण्डेसनलाई आर्थिक सहयोग गर्ने भएको छ ।

फार्नब्रोस्थित मगर भवनमा सम्पन्न बैठकले शाखाको माघे संक्रान्ति तथा पितृपूजामा दक्षिणाबाट संकलित रकम ५० हजार ५ सय ५५ रूपियाँ नेपालमा विपन्न दलित तथा जनजाति समुदायलाई बसोबासका लागि घर बनाउँदै गरेका हांस्यकलाकारहरु धुर्मुस र सुन्तलीलाई दिने निर्णय गरेको हो ।

बैठकमा सल्लाहकार तथा पूजा संयोजक ओम थापा काउचाले यस वर्षको दक्षिणा धुर्मुस सुन्तली फाउण्डेसनलाई दिन राखेको प्रस्ताव सर्वसम्मतिबाट निर्णय गरिएको थियो । सोही अनुरूप रकम पठाइएको थापा काउचाले जानकारी दिए ।

यसअघि शाखाले मगर पीएचडी तथा मास्टर्स छात्रवृत्ति कोषलाई १ लाख रुपैयां र लुम्बिनी बुद्ध बिहार स्थापनाका लागि २५० पाउण्ड सहयोग गरेको थियो ।

शाखाका अध्यक्ष लेख रानाको अध्यक्षतामा भएको बैठक सचिव बीर बलालले सञ्चालन गरेका थिए भने स्वागत उपाध्यक्ष श्रीमती हेमा रानाले गरेकी थिइन् ।

कार्यसमितिका सल्लाहकार र सदस्यहरूको उल्लेख्य उपस्थिति रहेको उक्त बैठकमा कोषाध्यक्ष हीरा पुनले आय व्यय विवरण प्रस्तुत गरेका थिए ।

बैठकले नेपाली र मगर भाषा कक्षा सञ्चालन गर्ने निर्णय गरेको छ । सो कक्षाका लागि संयोजक मगर संघ यूकेकी संस्थापक महिला संयोजक हाल ट्रस्टी श्रीमती गोमा राना, श्रीमती सीता थापा र अध्यक्ष लेख रानाले स्वयंसेवी रुपमा हरेक हप्ता एक दिन गर्ने निर्णय बमोजिम सोही दिन कक्षा सञ्चालन समेत गरिएको छ ।