पोर्तुगलमा भएको दुर्घटनाले नेपाली समुदाय स्तव्ध

पोर्तुगल । पोर्तुगलमा बिहीबार बिहान भएको दुर्घटनामा 
परी एक नेपाली युवतीको मृत्यु भएको छ । अन्य ७ घाइते भएका छन् । दुर्घटनामा परी चितवन निवासी अन्दाजी २४-२५ वर्षकी चेतमाया खुलालको घटनास्थलमै मृत्यु भएको बराइरो हस्पिटल मोन्तेजुले जनाएको छ । पोर्तुगलको फाइसबाट फिदिरियस जांदै गरेको गाडी 
सडकमा चिप्लिएर सेतुबल मोन्तेजुमा दुर्घटना भएको थियो ।

पाकिस्तानी ड्राइभरसंगै अन्य छ घाइते नेपाली महिलाको स्थानीय सेतुबल अस्पतालमा उपचार भइरहेको र उनीहरुको अवस्था सामान्य रहेको एनआरएनए पोर्तुगलका अध्यक्ष कुबेर कार्कीले जानकारी दिए । घाइते हुनेमा आरती श्रेष्ठ राई, उषा बर्तौला, अनिसा बिक, अल्का भेटवाल, ड्राइभर तुफेल मोहम्मद लगायत छन् ।

घट्नाबारे लिस्बोनस्थित अवैतनिक नेपाली बाणिज्यदूत र हाल लिस्बोनमा रहेकी पोर्तुगल हेर्ने फ्रान्सस्थित आवासीय नेपाली राजदूत श्रीमती अम्बिकादेवी लुईंटेललाई समेत अवगत गराइएको बताइएको छ ।

गणेश ज्ञवालीद्वारा सञ्चालित ‘क्यापासिटी फर वर्क’ नामक कम्पनीले आफ्ना कामदारलाई काममा लिएर जाने क्रममा बिहान करिव ८ बजे तिर सो दुःखद घट्ना भएको हो । गाडी चिप्लिएर दुर्घटना भएको जनाइएको छ । उनीहरु फुलमा काम गर्ने बुझिएको छ ।

मृतक खुलाल केही महिनाअघि मात्र पोर्तुगल आएकी थिइन् । उक्त कम्पनीमा एक भारतीयसहित १२ जना नेपाली महिला काम गर्छन् ।

‘घट्नाले प्रवासी नेपाली मञ्च पोर्तुगल मर्माहत’

उक्त घट्नाप्रति प्रवासी नेपाली मञ्च पोर्तुगलले दुःख व्यक्त गरेको छ । मञ्चले मृतकप्रति श्रद्धाञ्जली अर्पण गर्दै शोक सन्तप्त परिवारजनमा गहिरो समवेदना व्यक्त गरेको छ ।

मञ्चका महासचिव राजकुमार थापाले एक विज्ञप्ति प्रकाशित गर्दै दुर्घटनामा घाइते हुनेहरुको शीघ्र स्वास्थ्य लाभको कामना गरेका छन् ।

परदेशी भूमिमा भएको यस्तो दुःखद र असामयिक घट्नामा पोर्तुगलमा रहेका सम्पूर्ण नेपाली दाजुभाई तथा दिदीबहिनीहरुमा धैर्य रहन आग्रह गर्दै मञ्चले पीडित परिवारजन र व्यक्तिहरुलाई सबै खाले सहयोग र सहानुभूति जनाउन आव्हान समेत गरेको छ ।

घट्नापछि एनआरएनए पोर्तुगलले तत्काल लिएको पहलकदमी र तदारुकताका लागि मञ्चले सरहाना व्यक्त गर्दै पीडित परिवारजन र व्यक्तिहरुलाई आवश्यक पर्ने सबै खालको सहायता ब्यवस्था मिलाउन लिस्बोनस्थित अवैतनिक नेपाली बाणिज्यदूतको कार्यालय र फ्रान्सस्थित नेपाली दूतावास तथा अहिले पोर्तुगलमै 
रहेकी राजदूतको समेत ध्यानाकर्षण गराएको छ ।

मञ्चले यस दुःखद घडीमा आवश्यक सबैखाले सहयोगकालागि आफू तत्पर रहेको समेत जनाएको छ ।