नेपाल आइडल टिम बुधबार बिहान लन्डन उत्रंदै

लन्डन । नेपालको पहिलो ‘फ्रेन्चाइज’ रियालिटी शो ‘नेपाल आइडल ०१७’ का विजेताहरु यही बुधबार बिहान ८ बजे लन्डन हिथ्रो ओर्लने भएका छन् । नेपाल आइडल बुद्ध लामा, फस्ट रनरअप निसान 
भट्टराई र सेकेन्ड रनरअप प्रताप दासका साथ टप टेन प्रमिला राईलाई हिथ्रो टर्मिनल फोरमा भव्य स्वागतका लागि आयोजकले तयारी गरिरहेका छन् ।

बेलायतमा नेपाल आइडल विजेताहरुले विभिन्न ५ शहरमा कन्सर्ट गर्ने तयारी छ । नेपाल आइडल विजेताको पहिलो शो आगामी नोभेम्बर ३ मा अल्डरसटस्थित एम्पायर हल, दोश्रो नोभेम्बर ४ मा फोकस्टन केन्टस्थित हकिन्ज कम्युनिटी सेन्टर, तेश्रो ५ नोभेम्बरमा हयारो लिजर सेन्टर, चौंथो ११ नोभेम्बरमा रेडिङस्थित रिभरमेड लिजर कम्प्लेक्स र अन्तिम शो १२ नोभेम्बरमा प्लमस्टिडको एसियन कम्युनिटी हलमा हुनेछ ।

मनकामना रेमिट, पोखरा ट्राभल र मुनटाज इन्टरनेशनलले बेलायतमा नेपाल आइडल शो गर्न लागेका हुन् । हयारो लिजर सेन्टरमा हुने शो उमेशराज मोक्तान र चित्रबहादुर गुरुङ, रेडिङ शो सपनकुमार राई, विसन गुरुङ, मान गुरुङ र निल गुरुङ तथा प्लमस्टेड शो दीपक थापाले आयोजना गर्ने जिम्मेवारी लिएका छन् । रेडिङ शोमा यूके डान्स अफ २०१६ र ०१७ का विजेताहरु जेनी सुनुवार र जसिता गुरुङसहित स्थानीय समूहको विशेष नाच अतिरिक्त आकर्षण हुने आयोजकले बताएका छन् ।

लाइभ प्रोजेक्सनसहित लाइभ म्यूजिक र भिआइपीलाई बेग्लै सिट प्लान गरेर कार्यक्रम उत्कृष्ट गर्ने दावी आयोजकको छ । कार्यक्रम सञ्चालन नेपाल आइडलकै ‘होस्ट’ सुशील नेपालले गर्नेछन् ।