बेलायतमा ९ औं नेपाली मेला भव्य

लन्डन । लन्डनस्थित केम्पटन पार्क रेस कोर्स आइतबार मिनी नेपाल झैं सिंगारियो । करिब दश हजार नेपालीको जमघटले मात्र होइन, ९ औं नेपाली मेलामा प्रस्तुत विभिन्न जातजातीका  सांस्कृतिक झांकी, भेषभुषा र हाट बजारले नेपाल भन्दा फरक परिवेश अनुभूति गराएन ।

‘नेपाली संस्कृति र परिवेश सांच्चिकै नजिकबाट नियाल्न पाएं’, यूके नेपाल फ्रेण्डसीप सोसाइटीका कार्यकारी निर्देशक एलान सान्का दंग देखिन्थे । नेपाल गइरहने उनले बरु नेपालमै यस्तो वातावरण नदेखेको सुनाए । सहभागी अधिकांश आफ्नो मौलिक पोशाक र गरगहनामा सजिएका थिए ।

नेपालमा बाढी पीडितलाई राहत वितरण छाडेर मेलाकै लागि बेलायत आइपुगेका विशेष अतिथी एनआरएनए आइसीसी अध्यक्ष शेष घलेले नेपाली मेला वृहत देखेर गदगद भएको बताए । ‘नेपाली कला संस्कृति जीवित राख्ने यस्तो मेलाबाट विश्वका अन्य मुलुकका नेपालीले पनि सिक्नुपर्छ’, उनले सुझाए ।

लन्डनस्थित नेपाली दूतावासको सहकार्यमा ‘हाम्रो संस्कृति, हाम्रो पहिचान, हाम्रो गौरव’ नाराका साथ मेला भएको हो । मेलामा बेलायतस्थित नेपालीका जातीय र सामाजिक गरि २५ संघसंस्थाले झांकी प्रस्तुत गरे । नेपाली गीत संगीत, बाजागाजा अनि पहिरनले नेपालमय बन्यो केम्पटन पार्क रेस कोर्स । उक्त ठाउंमा अरु बेला घोडा दौड हुने गर्छ ।

प्रमुख अतिथी राजदूत दुर्गाबहादुर सुवेदीले नेपाल वहुजातीय, वहुसांस्कृतिक, वहुभाषिक र वहुधार्मिक मुलुक भएको जनाउंदै मेलामा प्रस्तुत झांकी, गीतसंगीत र नृत्यले नेपाली संस्कृति र सभ्यताको पहिचान दिलाएको बताए ।

मेला हेर्न चीन, बंगलादेश, म्यान्मार, साइप्रस, यमन, निकारागुवा, सेनेगल, फिलिपिन्स, माल्दिभ्स, इराक, इजरायल, लेसोथो, घाना, जमैका जस्ता विभिन्न देशका १६ राजदूतसहित कुटनीतिज्ञ, बेलायती सांसदहरु, स्थानीय मेयर, काउन्सिलरहरु आदि सहभागी भए ।

झांकीबाहेक युवाहरुको लाइभ म्यूजिक, लोक गीत संगीत, नृत्य प्रतियोगिता, खाना प्रदर्शनी आदि आकर्षण रहे । उत्कृष्ट झांकी र नाच गरेर लमजुङ समाज यूकेले एघारसय पाउण्डको एम्बासडर कप र एनआरएनए कप जित्यो । एम्बासडर कपमा घान्द्रुक समाज यूकेले दोश्रो र सिक्लेस पार्चे कम्युनिटी यूकेले तृतीय पुरस्कार जिते ।

महासचिव कृष्ण गुरुङले सञ्चालन गरेको औपचारिक कार्यक्रममा तमुधिं यूके अध्यक्ष ज्ञाम गुरुङले नेपाली कला संस्कृति, भाषा र परम्परा संरक्षण गर्ने परिकल्पनासहित नेपाली दूतावास र विभिन्न संघसंस्थाको सहयोगमा सन् २००९ देखि नेपाली मेला शुरु गरिएको जनाए । मेला पर्यटन प्रवर्धन र नेपाली समुदायका व्यवसाय विस्तारमा समेत कोशेढुंगा भएको उनको टिप्पणी थियो । मेला संयोजक तथा तमुधिं यूके उपाध्यक्ष हितकाजी गुरुङले स्वागत मन्तव्य दिंदै मेला व्यवस्थापनबारे बताए ।

मेलामा लन्डन मेयर सादिक खान आउने ९९ प्रतिशत निश्चित भएको बताएपनि उनी सहभागी भएनन् । बरु बेलायतको विपक्षी दलका नेता जेरेमी कोर्बिनको शुभकामना भिडियो सन्देश देखाइएको थियो ।

यसैबीच, तमुधिं यूकेले मेलाको अवसरमा सप्तरीका बाढी पीडितलाई १० लाख रुपैयां आर्थिक सहयोग प्रदान गरेको छ । तमुधिं यूकेले आफ्ना संरक्षक एवं एनआरएनए आइसीसी अध्यक्ष शेष घलेमार्फत उक्त रकम बाढी पीडितलाई दिएको हो । साथै, समारोहमा सर्वोच्च शिखर सगरमाथा आरोहण गर्ने पांचजना गोर्खा तथा चार एभरेष्ट म्याराथन धावकहरुलाई पनि सम्मान गरियो ।