राष्ट्रपति र प्रधानमन्त्रीद्वारा रक्षाबन्धन ग्रहण

काठमाडौँ, १३ साउन । राष्ट्रपति विद्यादेवी भण्डारीले रक्षाबन्धन पर्वको उपलक्ष्यमा ब्रह्मकुमारी राजयोग सेवा केन्द्रका राजयोगी तथा राजयोगिनीसित रक्षाबन्धन ग्रहण गर्नुभयो ।

शीतल निवासमा आज बिहान राष्ट्रपति भण्डारीले रक्षाबन्धन ग्रहण गर्नुभएको सेवाकेन्द्रका राजयोगी रामसिंह ऐरले जानकारी दिनुभयो ।

यसैगरी प्रधानमन्त्री शेरबहादुर देउवाले आज नै सेवा केन्द्रका राजयोगी तथा राजयोगिनीसित प्रम निवास बालुवाटारमा रक्षाबन्धन ग्रहण गर्नुभयो ।

सो अवसरमा राष्ट्रपति भण्डारी र प्रम देउवालाई सेवा केन्द्रका निर्देशक राजयोगिनी राजदिदी, राजयोगी ऐर, राजयोगी तिलकबहादुर शाही, राजयोगिनी अमरजित कौरलगायतले राखी प्रदान गर्नुभएको थियो ।

चाँगुनारायण मन्दिरमा दर्शनार्थीको ठूलो घुइँचो

भक्तपुर, १३ साउन । नागपञ्चमीको अवसरमा आज भक्तपुरको चाँगुनारायण मन्दिरमा दर्शनार्थीको ठूलो घुइँचो लागेको छ ।

प्रत्येक वर्ष साउन शुक्ल पञ्चमीका दिन यहाँ मेला लाग्ने गर्छ । नागपञ्चमीको दिन चाँगुनारायण मन्दिरबाट फर्किएर आ–आफ्नो घरको मूलढोकामाथि गाईको गोबरले नाग टाँसी दुबो, रायोको गेडा र गाईको दूध चढाउने परम्परा छ ।

त्यसैगरी आजै भक्तपुर नगरपालिकास्थित तिलमाधव नारायण र वाखुपति नारायणको मन्दिरमा पनि दर्शनार्थीको भीड लागेको छ । भक्तपुरको थालाछेंस्थित नागपोखरीमा पनि नागको पूजा गरी पञ्चमी मनाउनेको घुइँचो लागेको छ ।

टौदहमा विशेष घुइँचो

काठमाडौँ, १३ साउन । काठमाडौँको दक्षिण भेगस्थित टौदहमा दर्शनका लागि आज भक्तजनको विशेष घुइँचो लागेको छ ।

प्रत्येक वर्ष नाग पञ्चमीका दिन उक्त स्थानमा दर्शन गर्न काठमाडौँ उपत्यका तथा त्यस आसपास क्षेत्रबाट भक्तजन आउने गर्दछन् । कर्कोटक नागराजाको बासस्थान मानिने दहको किनारमा विशेषगरी नागपञ्चमीका दिन नागको पूजा गर्न तथा जनै पूर्णिमाका दिन तागाधारीले स्नानसहित जनै फेर्ने, रक्षा बन्धन बाँध्ने आदि गरिन्छ । जनैपूर्णिमाका दिन साउन २३ गते यसपटक चन्द्रग्रहण परेकाले जनैपूर्णिमा पनि आज नै मनाइएको छ ।

कर्कोटक नागराजाले आफ्नी रानीको आँखा दुखेपछि स्थानीय किसानलाई बोलाएर झारफुक (औषधि) गरी निको पारेको र नागराजा खुसी भई हिरा, मोती, मणि, माणिक्य जडिएको भोटो किसानलाई उपहारस्वरुप प्रदान गरेको किंवदन्ती पाइन्छ ।

उक्त दहमा आजको दिन स्नान गरी स्थानीयवासीले मकै, तरकारीलगायत चढाउने र नागको पूजा गर्नाले पारिवारिक सुख, शान्ति तथा सर्पबाट सुरक्षित होइने विश्वास रहेको स्थानीयवासी किरण केसीले जानकारी दिनुभयो । यसैगरी, नागदह, कटुवालदहलगायत स्थानमा पनि आज मेला लाग्ने गर्दछ ।