बम हातले टिपेर बाहिर फाल्ने हवल्दारलाई बेलायतबाट ५१ हजार सहयोग

लन्डन । निर्वाचनमा खटिएका बेला अज्ञात समूहले मतदान केन्द्रमा फालेको बम हातले टिपेर बाहिर फाल्ने साहस देखाएका प्रहरी हवल्दारलाई बेलायतबाट आर्थिक सहयोग गरिने भएको छ । बेलायतस्थित पूर्व प्रहरीहरुको संगठन पूर्व 
प्रहरी परिवार मञ्च यूकेले साहसी हवल्दार दुर्गाबहादुर 
रानालाई ५१ हजार रुपैयां प्रदान गर्न लागेको मञ्चका अध्यक्ष बाचस्पति रेग्मीले बताए ।

प्रहरीको उच्च मनोबल र साहसका लागि बेलायतबाट आर्थिक सहयोग गर्न लागिएको रेग्मीले बताए । सहयोग प्रहरी मुख्यालय पठाएर रानाको हातमा दिने मञ्चको तयारी छ । रेग्मी र पूर्व अध्यक्ष शिवजी श्रेष्ठको पहलमा आर्थिक सहयोग जुटाइएको हो ।

दोश्रो चरणको निर्वाचनका बेला तुलसीपुर नगरपालिका वडा नं ३ को आम्वासमा रहेको मतदान केन्द्रमा अज्ञात समूहले बम फालेको थियो । हवल्दार रानाले उक्त बम केही सेकेन्डमै जहांबाट आएको हो त्यहीं फालेर मतदानमा खटिएका कर्मचारी र मतदातालाई बचाएका थिए ।

गृहमन्त्री जनार्दन शर्मा र प्रहरीका उच्च अधिकारीले साहसिक काम गरेको भन्दै हवल्दार रानालाई त्यतिबेला धन्यवाद दिएका थिए ।गृहमन्त्री शर्माले प्रहरी हवल्दार रानालाई पुरस्कृत गर्ने समेत घोषणा गरेका थिए । सल्यानको शारदा नगरपालिका–१ निवासी राना २०६० सालमा प्रहरी सेवामा प्रवेश गरेका हुन् ।