निर्वाचनमा व्यापक सहभागिता र सर्वस्वीकार्य बनाउन राप्रपाको आग्रह

काठमाडौँ, १२ फागुन । राष्ट्रिय प्रजातन्त्र पार्टीको केन्द्रीय समितिको बैठकले मधेसी दलको माग सम्बोधन गरी निर्वाचनलाई व्यापक सहभागिता र सर्वस्वीकार्य बनाउन सबै दललाई आग्रह गरेको छ ।

पार्टीका अध्यक्ष कमल थापाको अध्यक्षतामा पार्टी कार्यालय धुम्रवाराहीमा बसेको पहिलो बैठकले स्थानीय निर्वाचनको स्वागत गर्दै स्थानीय तहको नयाँ संरचनामा पार्टी सङ्गठन विकास गर्न नेता राजेन्द्र लिङदेनको संयोजकत्वमा कार्यदल गठन गरेको पार्टीका केन्द्रीय सदस्य राजाराम श्रेष्ठले जानकारी दिनुभयो ।

उक्त बैठकले स्थानीय निर्वाचनमा उम्मेदवार छनोटका लागि विधि र प्रक्रिया तय गर्न पार्टीका अर्का नेता ध्रुवबहादुर प्रधानको संयोजकत्वमा कार्यदल गठन गरेको छ ।

सो बैठकले पार्टीको भर्खर सम्पन्न महाधिवेशनको व्यवस्थापनमा भएका कमी कमजोरीलाई समीक्षा गर्दै आगामी दिनमा मुलुकको राजनीतिक विकासमा पार्टीले निर्वाह गर्ने रणनीतिकाबारेमा छलफल गरेको छ ।