एनआरएनए यूकेले लाप्राकमा स्वयंसेवक खटाउने

लन्डन । एनआरएनए यूकेले एनआरएनए आइसीसीले गोरखाको लाप्राकमा निर्माण गरिरहेको ‘लाप्राक नमुना वस्ती’ मा स्वयंसेवक खटाउने भएको छ ।

एनआरएनए यूकेको आगामी १८ फेब्रुअरीका दिन प्लमस्टिडस्थित चौतारी रेष्टुरेन्टमा बस्ने कार्यसमिति बैठकमा स्वयंसेवक सम्वन्धमा निर्णय गरिने छ । यूकेबाट कति संख्यामा को को जाने भन्ने निर्णय बैठकमा गरिने संघले जनाएको छ । एनआरएनए आइसीसीले लाप्राकमा ५७३ वटा आवास गृह तीव्र रुपमा निर्माण गरिरहेको छ ।

बिहान ११ बजेदेखि हुने कार्यसमिति बैठकलाई संघले महत्वपूर्ण भन्दै सहभागिता जनाउन कार्यसमितिका सबै पदाधिकारी र सदस्यहरुमा अनुरोध गरेको छ ।

बैठकले आफ्नो महत्वकांक्षी ‘नेपाल हाउस’ प्रोजेक्ट कन्सेप्ट हेरफेर गर्ने भएको छ । झण्डै अढाइ मिलियन पाउण्ड लगानी हुने अनुमान गरिएको नेपाल हाउस अब च्यारिटी डोनेसनको सट्टा इन्भेस्टमेन्ट कन्सेप्टमा जाने तयारी गरिएको हो । संघलाई अहिले च्यारिटी डिनर गरेर वा चन्दा उठाएर आवश्यक लगानी जुटाउन हम्मे हम्मे परिरहेको छ ।

एनआरएनए यूके अध्यक्ष मुछेत्र गुरुङले बैठकमा एनआरएनए यूकेको स्कटल्याण्ड, नर्दन आयरल्याण्ड र वेल्समा गठन गर्न लागिएको क्षेत्रीय काउन्सिल सम्वन्धमा पनि छलफल हुने बताए । साथै नयां सदस्यता र आगामी ७ औं अधिवेशनको मिति र निर्वाचन समिति गठनबारे पनि बैठकमा टुंगो लगाइने गुरुङले जानकारी दिए ।