लन्डन । बेलायती रक्षामन्त्री मार्क ल्यानक्यास्टरको नेपाल भ्रमण अन्तिम समयमा स्थगित भएको छ । उनी ५ दिने भ्रमणका लागि सोमबार (फेब्रुअरी ६) मा नेपाल उड्ने तयारी थियो ।
बेलायती संसदमा जारी इयूबाट बेलायत बहिगर्मन (ब्रेक्जिट) को वहसमा व्यस्त हुनुपरेको जनाउंदै ल्यानक्यास्टरले तत्काललाई भ्रमण स्थगित गर्नुपरेको लन्डनस्थित नेपाली दूतावासलाई जानकारी गराएका छन् । ‘दुई दिन अघिमात्र रक्षा मन्त्रालयबाट मन्त्री व्यस्त भएकाले नेपाल जान नसक्ने खबर आयो’, दूतावासका प्रवक्ता तथा उपनियोग प्रमुख शरदराज आरणले भने, ‘तर, पछि अनुकुल समयमा जाने आश्वासन छ ।’
मन्त्री ल्यानक्यास्टरको भ्रमण स्थगित भएपनि ब्रिगेडिएर जनरल निक पोप, ब्रिगेड अफ गोर्खाज कर्णेल जेम्स रविन्सन लगायतको टोली भने नेपाल जांदैछ । नेपाल भ्रमणका क्रममा टोलीले राष्ट्रपतिसमक्ष गोर्खा ब्रिगेडको प्रतिवेदन बुझाउने, ब्रिटिश क्याम्प भ्रमण, भूपू गोर्खा परिवारको अवस्था बुझ्ने आदि कार्यक्रम छ ।
उता, मन्त्री ल्यानक्यास्टरको भ्रमण स्थगित भएकामा भूपू गोर्खाहरु सशंकित भएका छन् । रक्षा मन्त्रालयभित्र भेट्रान र रक्षा कर्मचारीहरुप्रति जिम्मेवार उनको भ्रमण स्थगितले वार्ताको आशामा बसिरहेका भूपू गोर्खाहरु सशंकित भएका हुन् । लन्डनस्थित नेपाली दूतावासको समन्वयमा भूपू गोर्खा समस्या समाधानका लागि वार्ता गर्ने तयारी थियो । ‘मन्त्री गएर नेपालमा भूपू गोर्खाहरुको अवस्था बुझ्ने र उच्च स्तरिय राजनीतिक भेट हुने आशा हामीलाई थियो तर स्थगित भएछ’, गोर्खा सत्याग्रह संयुक्त संघर्ष समितिका अभियान निर्देशक ज्ञानराज राईले भने, ‘आशा छ उहांको भ्रमण फेरि छिट्टै तय हुन्छ ।’
भूपू गोर्खाहरुले लामो समयदेखि समान पेन्सन लगायत माग राखेर आन्दोलन गर्दै आएका छन् । सत्याग्रह समितिले भूपू गोर्खाका ६ वटा संस्थाका अध्यक्ष र बेलायती सांसद एवं रक्षा मन्त्रालय (एमओडी) पदाधिकारीसंग छिट्टै छलफल हुने जनाएका छन् । इकान्तिपुर
