बोस्टनमा पहिलो पटक नेपाली नाटक मञ्चन हुंदै

बोस्टन । नेपाली नाट्य क्षेत्रका ‘भेट्रान’ जोडी सुनिल पोख्रेल र निशा शर्मा यतिखेर अमेरिकाको बोस्टनमा छन् । बोस्टनमा पहिलो पटक नेपाली नाटक मञ्चन गर्न सुनिल दम्पत्ति यहां आइपुगेका हुन् । उनीहरुका साथमा छोरा निसाङस पनि सहभागी छन् ।

‘याज्ञसेनी’ र ‘यात्रा’ नामक दुई नाटक आगामी आइतबार १३ नोभेम्बर सांझ मेडफोर्ड स्ट्रिट आर्लिङटन म्यासाचुसेट्समा मञ्चन हुन लागेको छ । हिमालयन हेरिटेज कल्चरल एकेडेमीले कार्यक्रम आयोजना गर्न लागेको हो ।

कार्यक्रम संयोजक सुरेश वाग्लेले प्रदर्शनको अन्तिम तयारी भइरहेको जनाए । उनले बोस्टनवासी नेपालीलाई नाटक हेर्न आउन अनुरोध समेत गरेका छन् । नेपाली नाटकलाई प्रवासमा जीवन्त राख्दै यसलाई अन्तर्राष्ट्रिय स्तरमा लैजान मञ्चन कार्यक्रम राखिएको वाग्लेले बताए ।

ऐतिहासिक हिन्दू ग्रन्थ ‘महाभारत’ कि मुख्य नारीपात्र ‘द्रौपदी’ को मनोविज्ञानमा आधारित डा. प्रतिभा रायद्वारा लिखित उपन्यास याज्ञसेनीमा वरिष्ठ नाट्यकर्मी निशा शर्माले अभिनय गर्नेछिन् । यसलाई नाट्यशैलीमा उतार्ने काम सुमन पोख्रेल र निर्देशन सुनिल पोख्रेलले गरेका हुन् ।

विगत चार दशकदेखि नाट्य अभिनयमा समर्पित सुनिल पोख्रेलको आफ्नै कथा अनि संस्मरण हो ‘यात्रा’ । यसमा सुनिलले अभिनय गर्ने कार्यक्रम छ । सुनिलका छोरा निसाङसले निर्देशन गरेको यात्रामा स्क्रिप्ट भने छैन् ।

यसअघि ति नाटक न्यूयोर्क र टेक्सासमा समेत प्रदर्शन गरिएको थियो । बाल्टिमोर र एटलान्टामा पनि कुरा भइरहेको नाट्यकर्मी पोख्रेलले जानकारी दिए ।

‘अघिल्ला शोहरुमा भौगोलिक जटिलता र जागिरको व्यस्तताबीच पनि जति दर्शक आउनुभयो सबै यसक्षेत्रप्रति सिरियस पाएं’, पोख्रेलले भने ।

सुनिल पोख्रेलद्वारा स्थापित नेपालकै पहिलो नाट्यशाला ‘गुरुकूल’ र ‘आरोहण’ नाट्य संस्थाले नेपालको ७५ वटै जिल्लामा हजारौं विद्यार्थीलाई नाट्य लेखन, निर्देशन र अभिनय सम्बन्धि तालिम दिन सफल भएको छ ।