गोर्खाले सार्वजनिक गरे म्यूजिक भिडियो

लन्डन । फोक्सटनस्थित दोश्रो गोर्खा रेजिमेन्टमा कार्यरत सैनिक राजन लिम्बुले प्रेमघातमा आधारित के भयो.. बोलको गीतको म्यूजिक भिडियो सार्वजनिक गरेका छन् ।

निर्माण समूहले अघिल्लो शुक्रवार यू ट्युब मार्फत उक्त भिडियो सार्वजनिक गरेको हो ।

प्रेमघातमा आधारित शब्द रचनालाई गायक राजन लिम्बुले डेब्यु गरेका हुन् भने अल्मोदा राणा उप्रेतीले संगीत भरेका छन् ।

नरेन लिम्बुद्वारा निर्देशित म्यूजिक भिडियोलाई ब्रायन राई र सुदेश गुरुङले खिचेका हुन् भने भिडियोलाई विनय कन्सकारले सम्पादन गरेका छन् । भिडियोमा सिजी थापाको मेकअप र लिड रोलमा मोडेल श्यारन श्रेष्ठको अभिनय छ ।

उक्त गीत ब्रिगेड अफ व्याण्डका रिटायर्ड वारेन्ट अफिसर इन्द्र गुरुङको रेन्वो साउण्ड एण्ड स्टूडियो बेलायतमा रेकर्ड गरिएको हो ।

के भयो मेरो मनलाई आज अचानक के भयो,
हिजो सम्म तिमीलाई खोज्दै थियो ,
तर आज त्यो भावना कता हरायो…

धरान निवासी गायक राजन सांगीतिक क्षेत्रमा बेग्लै सम्भावना बोकेर आएका छन् । अहिलेको आधुनिक परिवेशमा नेपाली सांगीतिक क्षेत्रमा युवा पुस्ता माझ चम्किलो तारा बन्न सक्ने संकेत उनको डेब्यु भिडियोले दिएको छ ।

गायक लिम्बु सानै उमेरदेखि नेपाली गीत संगीतप्रति अत्यन्तै रुचि राख्थे । उनको प्रेरणाको स्रोत आफ्नै घरपरिवार हो ।

गोर्खालीहरू बन्दुक चलाउन मात्र सीपालु नभई सृजनात्मक कार्यमा पनि अगाडि भएको ठान्ने उनी लाहुरे हुनुमा गर्व गर्छन् ।

लाहुरे परिवार भनेको बजारमा सामान किन्ने र घर भित्रमात्रै सिमित हुन्छन् भन्ने सामाजिक धारणालाई गायक लिम्बुको यस प्रयासले गलत सावित गरिदिएको छ ।