नेपाल–चीन उड्डयन सहकार्य

काठमाडौ, ६ माघ । सरकारले मुलुकको हवाई सुरक्षा विश्वासिलो बनाउनका लागि अन्तर्राष्ट्रिय र घरेलु विमानस्थल दुबैलाई बलियो बनाएर लैजाने तयारी गरेको छ ।

सिन्हवा समाचार समितिले आज यहाँ आयोजना गरेको ‘नेपाल–चीनबीचको उड्डयन सहकार्यः अवसर र चुनौती” विषयक गोष्ठीमा संस्कृति, पर्यटन तथा नागरिक उड्डयन मन्त्री आनन्दप्रसाद पोखरेलले अन्तर्राष्ट्रिय विमानस्थलका साथै घरेलु विमानस्थललाई पनि बलियो बनाउने सरकारको तयारी भइरहेको बताउनुभएको छ ।

हाल एउटा मात्र अन्तर्राष्ट्रिय विमानस्थल भएकाले पोखरा विमानस्थल, गौतमबुद्ध विमानस्थल र निजगढ विमानस्थललाई अन्तर्राष्ट्रियस्तरको बनाउने सरकारको तयारी रहेको मन्त्री पोखरेलले जानकारी दिनुभयो । “पोखरा विमानस्थल निर्माण दुई देशको सम्बन्धको सेतु हो” उहाँले भन्नुभयो । विमानस्थल निर्माणका लागि चीन सरकारले रु दुई अर्ब २० करोड सहुलियतपूर्ण ऋण उपलब्ध गराएको छ ।

विगतमा आन्तरिक उडानका लागि चीन सरकारले एम ६० र वाई १२ जहाज अनुदानमा दिएको छ । ‘एम ए छ’ एउटा र वाई १२ को तीनवटा गरी चारवटा जहाज चीनबाट ल्याउने तयारी भइरहेको छ । मन्त्री पोखरेलले चीनबाट चारवटा विमान निकट भविष्यमै ल्याउने र १७ वटा घरेलु विमानस्थल निर्माणको काम पनि वैखाशसम्म निर्माण पूरा गरेर विमाानस्थल सञ्चालन गरेर यात्रुलाई टिकट नपाउने अवस्थाको अन्त्य गर्ने बताउनुभयो ।

नेपालका लागि चिनियाँ राजदूत वु चुन्ताईले नेपाल–चीनबीचको सहयोग एक–अर्कामा राम्रो भएको भन्दै नेपालको सामाजिक र आर्थिक विकासका लागि निरन्तर सहयोग हुने विश्वास व्यक्त गर्नुभयो । नेपाल नागरिक उड्डयन प्राधिरकणका प्रबन्ध निर्देशक सञ्जिव गौतम, एयरलाइन्स एसोसिएसन अफ नेपालका अध्यक्ष रामेश्वर थापालगायतले नेपालमा पर्यटन उद्योगको विकासका लागि हवाईसेवा पर्याप्त हुनुपर्नेमा जोड दिनुभयो ।

सिन्हवा समाचार समिति काठमाडौँ ब्युरोका प्रमुख झाउ सेङपिङले नेपाल–चीनबीचको पर्यटन विकासमात्र नभई आर्थिक र सामाजिक विकासमा पनि उड्डयन सहकार्य महत्वपूर्ण भएको बताउनुभयो ।