तीन दल र मोर्चाको कार्यदलबीचमा बुँदागत छलफल

काठमाडौँ, २३ पुस । तराईमा आन्दोलनरत संयुक्त लोकतान्त्रिक मधेसी मोर्चाका मागबारे छलफल गर्न गठित प्रमुख तीन दल र मोर्चाको कार्यदलबीच आज सिंहदरबारमा बुँदागत छलफल सुरु भएको छ ।

दुवै कार्यदलका बीचमा मोर्चाका ११ बुँदे मागबारे बुँदागत छलफल सुरु भएको कार्यदलमा नेपाली काँग्रेसका तर्फबाट सदस्य रहेका महेश आचार्यले बैठकपछि सञ्चारकर्मीलाई जानकारी दिए । उनले भने– “वार्ता सकारात्मक रुपमा अगाडि बढिरहेको छ । वार्ता र संवादका माध्यमबाट मोर्चाले राखेका मागका सही समाधान निस्कन्छ ।”

दुवै कार्यदलमा रहेका सदस्यले आजको बैठकमा भएका प्रगति र उपलब्धिबारे आफ्ना पार्टीका शीर्ष नेतृत्वलाई जानकारी गराई आजै बस्ने अर्काे बैठकमा थप कुरा गर्ने सहमति भएको छ । कार्यदलका सदस्य आचार्यले बैठक सकारात्मक रुपमा निष्कर्ष उन्मुख भएको जानकारी दिँदै मागहरुमध्ये प्रदेशको सीमाङ्कनको विषयलाई राजनीतिक समिति बनाई समाधान खोज्नेतर्फ संवाद भइरहेको बताए ।
तर, बैठकमा सहभागी तराई मधेस लोकतान्त्रिक पार्टीका उपाध्यक्ष एवम् कार्यदलका सदस्य हृदयेश त्रिपाठीले राजनीतिक समितिको कार्यादेश के हुने ? उसको विश्वसनीयता र वैधानिकता के रहने ? भन्ने प्रश्न गरे ।
उनले बैठकमा मोर्चाले राखेका मागमाथि बुँदागत छलफल सुरु भएको जानकारी दिँदै अझ पनि माग सम्बोधनका लागि सरकारी तयारी सकारात्मक नदेखिएको टिप्पणी गरे ।

बैठकमा मोर्चाका तर्फबाट ११ बुँदे मागबारे कार्यदलले एकसरो कुरा राखेको पनि उपाध्यक्ष त्रिपाठीले बताए ।
बैठकमा प्रमुख तीन दलका तर्फबाट नेकपा (एमाले)का उपाध्यक्षसमेत रहेका उपप्रधानमन्त्री भीम रावल, एकीकृत नेकपा (माओवादी) महासचिव कृष्णबहादुर महरा र नेपाली काँग्रेसका नेता आचार्य थिए ।
यस्तै मोर्चाका तर्फबाट कार्यदलमा रहनुभएका तमलोपाका उपाध्यक्ष त्रिपाठी, सङ्घीय समाजवादी फोरम नेपालका उपाध्यक्ष राजेन्द्र श्रेष्ठ र तराई मधेस सद्भावना पार्टीका वरिष्ठ नेता रामनरेश राय सहभागी थिए ।

सङ्घीय समाजवादीका उपाध्यक्ष श्रेष्ठले दुवै कार्यदलका बीचमा छलफल अगाडि बढिरहेको बताए । सो कार्यदलको पहिलो बैठक बुधबार बसेको थियो । मोर्चाले आन्दोलन थालेको चार महिना पुग्न लागेको छ ।