युकेमा कुबेर राई र आभा मुकारुङको सांगीतिक साँझ

लण्डन । बेलायतको सांगीतिक भ्रमणमा रहेका गायक कुबेर राई र गायिका आभा मुकारुङले फोल्क्स्टोनस्थित लेमोन लिफ रेस्टुरेन्टमा प्रतिभा सांगीतिक साँझ सम्पन्न गरेका छन् ।
शनिबार आयोजित सो सााझको आयोजना नेपाली प्रतिभा प्रतिष्ठान बेलायतले गरेको थियो भने कार्यक्रममा राई र मुकारुङले स्थानीय नेपाली वाद्यवादकको साथमा लाइभ गाएका थिए ।
दर्शकहरूको बाक्लो उपस्थिति रहेको सो कार्यक्रममा राई र मुकारुङले मायाले मुलबाटो भुलेछ, कता हिाडेको कसलाई खोजेको जस्ता आफ्ना सदाबहार गीतहरू गाएर दर्शकहरूलाई मनोरन्जन गराएका थिए । यसका साथै नारायणगोपाल, तारादेवी, अरुणा लामा, डेजी बराइली, आश भोस्ले र उदितनारायण लगायतका गायक-गायिकाहरुको कालजयी गीतहरु गाउँदा दर्शकहरूले ताली बजाएर साथ दिइरहेका थिए ।
हार्मोनियम, तबला र गीतारको साथमा राई र मुकारुङले गाइरहँदा नारायण गोपाल र अरूणा लामाको विगतको एकल सांझको सम्झना गराउँथ्यो । स्टेज शोभन्दा भिन्नै स्वाद दिइएको सो सांझमा दर्शकहरूले आनन्द मात्र होइन सिङ्गो नेपाली गीत संगीतलाई नजिकबाट बुझ्ने अवसर पनि पाएका थिए ।
लाईभ बाद्यवादनहरुको संयोजन गरिएको सो सांगीतिक साँझमा संगीत र सुर बुझेका प्रवुद्ध दर्शक स्रोताहरूको जमघट रहेको थियो । राई र मुकारुङको गायनलाई बुझेर आएका समाजसेवी, साहित्यकार तथा संगीतकर्मीहरू टाढा-टाढाबाट आएका थिए भने गोर्खाली पल्टनका सदस्यहरुको पनि सहभागिता रहेको थियो ।
सो कार्यक्रमबाट स्थानीय गायक, गायिका, संगीतकार र गीतकारहरुमा धेरै उर्जा मिलेको अनुभूति उनीहरुले सुनाए ।
कार्यक्रममा तबलाबादनमा गायक गगांराज राईले साथ दिएका थिए भने संगीत विधामा मास्टर डिग्री गरिसकेका बी सी राईले गीतारमा । अर्का हेमकर्ण राईले पनि गीतारमा साथ दिएका थिए भने किरात राई कलाकार संघ बेलायतका महासचिव डिल्लीराम राईले साउण्ड इन्जिनियरिङको काम सम्हालेका थिए ।
कार्यक्रम प्रतिष्ठानका सचिव नरेश नातिले संचालन गरेका थिए ।
हेर्नुहोस भिडियो