बेलायतबाट गएका आचार्यबाहेक रित्तै

लन्डन । बेलायतबाट एनआरएनए केन्द्र ताक्नेहरु यसपटक पनि जिल्लिएका छन् । एनआरएनए यूके पूर्व अध्यक्ष एवं सफल व्यवसायी कुल आचार्य युरोप क्षेत्रीय संयोजकमा निर्विरोध निर्वाचित भएर यूकेको इज्जत जोगाएपनि यहांबाट गएका अन्य तीन जना लक्ष्यबहादुर गुरुङ, सुरेन्द्र श्रेष्ठ र थर्क सेन पराजित भए ।

एनआरएनए उपाध्यक्षमा रहर गरेका लक्ष्यबहादुर गुरुङले नमिठो हार व्यहोर्नु परेको छ । २०११ मा एक कार्यकाल क्षेत्रीय उपसंयोजक भएका उनी यसपटक उपाध्यक्षमा भिडेका सफल व्यवसायीहरु कुमार पन्त र भवन भट्टका सामु निरिह भए ।

त्यस्तै, सचिवमा लडेका सुरेन्द्र श्रेष्ठलाई अर्जुनकुमार श्रेष्ठले पराजित गरिदिएका छन् । उता, एनआरएनए युरोप उपसंयोजकमा लडेका थर्क सेनले पनि हार चाखे । युरोप उपसंयोजकमा दावा शेर्पा र प्रेम गुरुङ निर्वाचित भएका छन् ।

उनीहरुले बेलायतको नेपाली समुदायमा चिनिएपनि विश्वभरका एनआरएनमाझ त्यस्तो पकड बनाइसकेका थिएनन् । उनीहरुको पराजयले बेलायत एनआरएनभित्रै एकता छैन् भन्ने आशंकालाई पुष्टि गरिदिएको छ ।