ग्रेटर रसमोर नेपाली कम्युनिटी र प्रहरी प्रशासनबीच भेटघाट

फानबोरो । ग्रेटर रसमोर नेपाली कम्युनिटी पदाधिकारीले स्थानीय प्रहरी प्रशासनसंग भेटघाट एवं परिचयात्मक कार्यक्रम गरेका छन् । रसमोर बरो काउन्सिलका कम्युनिटी डेभलप्मेण्ट अफिसर लुइस वेवर र रसमोरका चिफ इन्स्पेक्टर आनबेल बेरीको निमन्त्रणमा ग्रेटर रसमोर नेपाली कम्युनिटीका अध्यक्ष ओम थापा, वरिष्ठ उपाध्यक्ष जीव बेल्बासे, उपाध्यक्ष रामधन राई, उपाध्यक्ष छविमाया पुन, महासचिव रन्जिता मल्ल, सचिव बीर बलाल र प्रवक्ता मान गुरुङले भेटघाट गरेका हुन् ।

भेटमा रसमोर बरो काउन्सिल, प्रहरी र कम्युनिटीको आपसी समन्वयबाट समाजमा शान्ति सुब्यवस्था कायम गर्दै बेला बेला आइपर्ने घट्नाको सफल अनुसन्धान तथा अपराध रोकथाममा पुर्याउन सकिने टेवाबारे छलफल भयो ।

उक्त अवसरमा प्रहरी प्रशासनले कुनै एउटा मात्र समुदाय विशेषलाई प्राथमिकतामा राख्दा समाजमा पर्न जाने असरलाई मध्यनजर राख्दै रसमोरस्थित फरक समुदायबीच आपसी सुमधुर सम्वन्ध स्थापित गराउन काउन्सिल, प्रहरी र ग्रेटर रसमोर नेपाली कम्युनिटीले सकेसम्म एक अर्काको कार्यक्रममा उल्लेख्य सहभागिता जनाउने 
प्रतिवद्धता समेत व्यक्त भएको थियो ।

भेटघाटमा कम्युनिटी डेभलप्मेण्ट अफिसर लुइस वेवरले अंग्रेजी बोल्न नजान्ने नेपाली वृद्धवृद्धाको सहयोगार्थ अस्पताल, जीपी, सिटिजन एड्भाइस ब्युरो लगायत निकायमा नेपाली कर्मचारी व्यवस्था गरिएको जनाइन् । उता, चिफ इन्स्पेक्टर आनबेल 
बेरीले रसमोर र आसपासमा नेपालीहरुको जनघनत्व बढ्दै गएको परिवेशमा १३ देखि १८ वर्ष उमेरको क्याडेटमा र १८ देखि ५५ वर्ष सम्म कम्युनिटी प्रहरीको भर्नामा उल्लेख्य नेपालीहरुको सहभागिता रहने विश्वास व्यक्त गरिन् ।

भेटघाटको अन्त्यमा आफ्नो कार्यकाल सकिए पश्चात नयां कार्यसमिति र स्थानीय प्रहरी प्रशासन र अन्य निकायसंग परिचय गराउन समन्वयकारी भूमिका खेल्ने निवर्तमान अध्यक्ष मेजर रिटायर्ड टिकेन्द्र दल देवान र बैठक व्यवस्थापनमा सहयोग गर्ने बिजिडब्लुएस् महासचिव छत्र राईप्रति आभार व्यक्त गरिएको थियो ।