नेपाल-बेलायत संसदीय मैत्री समूह रास्वपा सांसद मनिष झाको संयोजकत्वमा गठन

काठमाडौँ । सङ्घीय संसद् सचिवालयले नेपाल र विश्वका विभिन्न मुलुकलाई मित्रवरुपमा जोड्न ४३ मैत्री संसदीय समूह गठन गरेको छ ।

सङ्घीय संसद्को दुवै सदन प्रतिनिधिसभा र राष्ट्रियसभामा रहेका सबै दलका सदस्यहरूलाई जिम्मेवारी दिइएको सो समूहमा संयोजक तथा सदस्यहरू तोकिएको छ । प्रतिनिधिसभाका सभामुख डोलप्रसाद अर्यालको सचिवालयका अनुसार ‘नेपाल–भारत संसदीयमैत्री समूह’, ‘नेपाल–अमेरिका संसदीयमैत्री समूह’, ‘नेपाल अष्ट्रेलिय संसदीयमैत्री समूह’ लगायत समूह गठन गरिएको हो ।

नेपाल-बेलायत संसदीय मैत्री समूह रास्वपा सांसद मनिष झाको संयोजकत्वमा गठन गरिएको छ भने नेपाल-अमेरिका संसदीय मैत्री समूह रास्वपाकै निशा डाँगीको संयोजकत्वमा गठन गरिएको छ । नेपाल-रुस संसदीय मैत्री समूहको नेतृत्वमा नेकपाका वर्षमान पुन छन् भने नेपाल-आयरल्यान्ड संसदीय मैत्री समूहको संयोजक श्रम संस्कृति पार्टीका अध्यक्ष हर्कराज राई रहेका छन् ।

भारतका लागि गठित संसदीय मैत्री समूहमा विदुषी राणा, अरविन्द साह, पुनम अग्रवाल, चन्द्रमोहन यादव, सन्दीप राना, मोहम्मद इस्तियाक राई, ताहिर अलि भाट, आरेन राई र महन्थ ठाकुर सदस्य छन् ।

नेपाल-फ्रान्स संसदीय मैत्री समूहको नेतृत्व एमालेकी पद्मा अर्यालले पाएकी छन् भने नेपाल-बंगलादेश संसदीय मैत्री समूहको संयोजक कांग्रेसकी सांसद गीता गुरुङ रहेकी छन् ।