नेपाल मगर संघको १३ औँ राष्ट्रिय महाधिवेशन काठमाडौंमा

नेपालको तेस्रो ठूलो जनसंख्या भएको मगर समुदायको साझा अधिकारमुखी संस्था नेपाल मगर संघको १३ औँ राष्ट्रिय महाधिवेशन यही जेठ ८, ९ र १० गते काठमाडौंमा हुने भएको छ ।
महाधिवेशनमार्फत नयाँ नेतृत्व चयनदेखि संगठनको भावी कार्यदिशासम्म तय गरिने संघले जनाएको छ । नेपाल मगर संघले काठमाडौंमा पत्रकार सम्मेलन गर्दै १३ औँ राष्ट्रिय महाधिवेशनको अन्तिम तयारी पूरा भएको जानकारी दिएको छ ।
“ऐतिहासिक मगरात सभ्यता र प्राचीन संस्कार–संस्कृतिको जगमा मगरात दर्शन निर्माण गरौं, समृद्ध मगर समाज निर्माणको पक्षमा १३ औँ राष्ट्रिय महाधिवेशन भव्यताका साथ सफल पारौं” भन्ने मूल नारासहित महाधिवेशन आयोजना गर्न लागिएको हो ।
महाधिवेशनको उद्घाटन कमलादीस्थित नेपाल प्रज्ञा–प्रतिष्ठानमा हुने र उद्घाटन पूर्व अर्थमन्त्री तथा प्रतिनिधिसभा सदस्य बर्षमान पुनले गर्ने कार्यक्रम रहेको छ । उद्घाटन सत्रअघि मगर समुदायको मौलिक संस्कृति, भेषभूषा र पहिचान झल्किने सांस्कृतिक ¥याली भृकुटीमण्डपबाट सुरु भएर पुतलीसडक हुँदै कमलादी पुगेर सभामा परिणत हुने नेपाल मगर संघका महासचिव टेक नाम्जाली मगरले जानकारी दिनुभएको छ ।
देशभरका ६८ जिल्ला, सात प्रदेश समिति, नौ भ्रातृ संस्था तथा १३ प्रवास शाखाबाट करिब सात सय प्रतिनिधिको सहभागिता रहने संघले जनाएको छ ।
संघका अध्यक्ष ज्ञानेन्द्र पुन मगरले महाधिवेशनले नयाँ नेतृत्व चयन गर्नु मात्रै नभई संगठनात्मक पुनर्संरचना, आदिवासी जनजातिको अधिकार, सांस्कृतिक अस्तित्व, भाषिक विविधता र समावेशी प्रतिनिधित्वजस्ता विषयमा नीतिगत बहस समेत गर्ने बताउनु भएको छ ।
महाधिवेशनको बन्दसत्र भने जेठ ९ र १० गते नेपाल पुलिस क्लब, भृकुटीमण्डपमा सञ्चालन हुने जनाइएको छ ।
वि.सं. २०३९ फागुन १५ गते स्थापना भएको नेपाल मगर संघले ऐतिहासिक आन्दोलन र सामाजिक एकताको माध्यमबाट मगर समुदायलाई संगठित गर्दै आएको छ । विगतदेखि मगर समुदायको पहिचान, भाषा, संस्कृति र अधिकार संरक्षणका मुद्दा उठाउँदै आएको नेपाल मगर संघले संघीयता, समावेशी लोकतन्त्र र समानुपातिक सहभागिताको बहसमा पनि महत्वपूर्ण भूमिका खेलेको दाबी गरेको छ ।