बेलायतबाट डा हेमराज शर्माद्वारा एनआरएनएको अध्यक्ष पदमा उम्मेदवारी दिने घोषणा

लन्डन । गैरआवासीय नेपाली संघ (एनआरएनए) को आगामी १२औँ महाधिवेशन (मार्च १४–१६) मा बेलायतबाट डा हेमराज शर्माले अध्यक्ष पदमा उम्मेदवारी दिने घोषणा गर्नुभएको छ ।

रिब्रान्डिङ एनआरएनएको मुख्य उद्देश्यसहित नयाँ कार्यकालका लागि अध्यक्ष पदमा उम्मेदवारी दिने डा. शर्माले आइतबार भर्चुअलमाध्यमबाट घोषणा गर्नुभएको हो । उहाँ हाल उपाध्यक्ष हुनुहुन्छ । डा शर्माले प्रतिबद्धतापत्र समेत सार्वजनिक गर्नुभएको छ ।

बागलुङको अमलाचौरमा जन्मिएका शर्मा एनआरएनभित्रका सक्रिय प्राज्ञिक व्यक्तित्वको रुपमा परिचित हुनुहुन्छ । उहाँले भौतिकशास्त्रमा त्रिभुवन विश्वविद्यालयबाट गोल्ड मेडल समेत हासिल गर्नुभएको छ । उनले सन् १९९७ मा जापानको रिक्यो विश्वविद्यालयमा मास्टर्स कोर्स गर्नुभएको थियो भने १९९८ मा इटालीबाट थप मास्टर्स डिग्री हासिल गर्नुभयो । उहाँले सन् २००२ मा फ्री युनिभर्सिटी बर्लिनबाट ‘फिजिक्स’ मै पिएचडी गर्नुभएको हो ।

सन् २००५ मा एनआरएन जापानको महासचिवको जिम्मेवारी सम्हालेका शर्माले सन् २००७ मा बेलायत आएसँगै त्यहाँको आइसीसी सदस्यमा मनोनीत हुनुभएको थियो ।