पद सम्हालेको एक वर्ष नपुग्दै बेलायतका लागि नेपाली राजदूत घिमिरे स्वदेश फिर्ता

लन्डन । पद सम्हालेको एक वर्ष नबित्दै बेलायतका लागि नेपाली राजदूत चन्द्रकुमार घिमिरे स्वदेश फर्कनुभएको छ ।

नेपालमा जेनजी आन्दोलनका कारण बनेको नयाँ सरकारले फिर्ता बोलाएपछि राजदूत घिमिरे मंगलबार धर्मपत्नी सरिता न्यौपाने घिमिरे र दुई सहयोगीका साथ लन्डनस्थित हिथ्रो एयरपोर्ट हुँदै नेपाल फर्किनुभएको हो । गत असोज ३० को नेपाल सरकार मन्त्रिपरिषद् बैठकले बेलायतसहित ११ देशका राजदूतलाई फिर्ता बोलाउने निर्णय गरेको थियो ।

राजदूत घिमिरेलाई बिदाइ गर्न कार्यवाहक राजदूत विपिन दुवाडी र दूतावासका सैनिक सहचारी सहायक रथी अनुप शाह हिथ्रो विमानस्थल पुग्नुभएको थियो ।

नेपाल फर्कने क्रममा फेसबुकमा गुडबाई डियर यूके लेख्नुहुँदै राजदूत घिमिरेले बेलायतमा नेपाली समुदायले देखाए निःशर्त र असीमित माया तथा सम्मानका लागि आभार प्रकट गर्नुभएको छ ।

घिमिरेले गत १७ जनवरी २०२५ मा लन्डनस्थित नेपाली दूतावासमा २३औँ राजदूतका रूपमा कार्यभार सम्हाल्नुभएको थियो । सर्वोच्च अदालतले राजदूत फिर्ता गर्ने निर्णय कार्यान्वयन नगर्न आदेश दिएपछि परराष्ट्र मन्त्रालयले सोमबार दूतावासहरुलाई पत्राचार गर्दै ३ तीनभित्र फर्कन भनेको थियो ।

सरकारले चीन, जर्मनी, मलेसिया, इजरायल, कतार, रुस, साउदी अरब, स्पेन, बेलायत, संयुक्त राज्य अमेरिका र जापानमा कार्यरत राजदूतहरूलाई फिर्ता बोलाएको थियो ।