‘उरमाल’लाई मदन पुरस्कार, प्रेमदेवलाई जगदम्बा श्री प्रदान गरिने

काठमाडौं । २०८१ सालको मदन पुरस्कार छुदेन काविमोको उपन्यास ‘उरमाल’ले दिइने भएको छ ।

मदन पुरस्कार गुठीको शुक्रबार बसेको बैठकले ‘उरमाल’लाई यस वर्ष मदन पुरस्कार अर्पण गर्ने निर्णय गरेको गुठीका अध्यक्ष कुन्द दीक्षितले जानकारी दिनुभएको छ । उहाँका अनुसार २०८१ सालको जगदम्बाश्री पुरस्कार प्रेमदेव गिरीलाई दिने निर्णय भएको छ ।

विगत पाँच दशकदेखि लोक संस्कृति क्षेत्रमा सक्रिय रहेका गिरीलाई भने लोकभाका संकलन र संरक्षणमा विशिष्ट योगदान गरेबापत उक्त पुरस्कार दिने निर्णय गरेको हो ।

यस वर्षको मदन पुरस्कारका लागि श्रेष्ठ सूचीमा छुदेन काविमोको ‘उरमाल’, रमेश भुसालको ‘छालबाटो’, कुमारी लामाको ‘दर्ज्यु संलाप’, मनप्रसाद सुब्बाको ‘पञ्चतत्त्वको पालाम’, श्रेयज सुवेदीको ‘बहुरुपी’, सुधीर शर्माको ‘भिक्षु, व्यापार र विद्रोह’ र तीर्थ गुरुङको ‘हिउँको गीत’ परेका थिए ।