चार लाख राशिको पहिचान पुरस्कार ‘ओ पेङ्दोर्जे’ लाई

लन्डन । चार लाख राशिको यस वर्षको पहिचान पुरस्कार राजु स्याङ्तानको कवितासंग्रह ‘ओ पेङ्दोर्जे’ लाई प्रदान गरिने भएको छ ।

पहिचान पुरस्कार कोषका बोर्ड अध्यक्ष सुवास राईले शुक्रबार प्रेस विज्ञप्ति जारी गर्दै स्याङ्तानको कवितासंग्रह ‘ओ पेङ्दोर्जे’ लाई २०८०/८१ को पहिचान पुरस्कार दिने निर्णय भएको जनकारी दिएको हो । पुरस्कारको राशि ४ लाख २ हजार २ रुपैयाँ छ ।

यस वर्ष पहिचान पुरस्कारका लागि ८ वटा कृति मनोनयनमा परेका थिए । स्याङ्तानको ‘ओ पेङ्दोर्जे’ सहित गीलु रातोसको ‘सिलीदुङ’, विश्व कुँइकेल ‘गोपीचा’, मिथोचको ‘आगोको पिदार’, प्रविण खालिङको ‘चिया गफ’, अभागी थेगुवाको ‘सपनाहरूको बही’, श्याम सामसोहाङ राईको ‘मुन्दुम ट्रेल’ र निर्भीकजंग राईको ‘त्यसरी त कहिल्यै सोचिएन’ अन्तिम सूचीमा परेका थिए ।

‘ओ पेङदोर्जे’ कविता संग्रह गोर्खा राज्य विस्तार हुनुअघि र गोर्खा राज्य विस्तार भएपछि आफ्नो पहिचानका लागि रगत पसिना साथै जीवन आहूति दिने तामाङ जाति र अन्य भूइँमान्छेहरुले खेपेको शोषणका बारेमा लेखिएको छ । विषय, शिल्प, शैली, प्रस्तुति सबै दृष्टिकोणले कविता सङ्ग्रह ‘ओ पेङदोर्जे’लाई पहिचान पुरस्कार दिने घोषणा गरिएको संस्थापक नरेश काङमाङ राईले जानकारी दिनुभएको छ ।

संस्थाले जनाएअनुसार, २०८१ साल चैत्र २३ गते भोजपुर जिल्लाको टेम्के मैयुङ गाउँपालिका वार्ड नम्बर ४ को सुन्दर चखिया डाँडामा पुरस्कार वितरण गरिने छ ।