नोभेम्बरमा बेलायतको अर्थतन्त्रमा झीनो सुधार

लण्डन । बेलायतको अर्थतन्त्रमा नोभेम्बर महिनामा झीनो सुधार देखिएको छ ।
अफिस फर न्याशनल स्ट्याटिटिक्स (ओएनएस) ले शुक्रबार सार्वजनिक गरेको तथ्यांकअनुसार नोभेम्बर महिनामा बेलायतको कुल ग्राहस्र्थ उत्पादन (जीडीपी) ०.३ प्रतिशतले बढेको पाइएको छ ।
यसअघि अक्टोबर महिनामा बेलायतको जीडीपी ०.३ प्रतिशतले खुम्चिएको थियो ।
अर्थशास्त्रीहरुले भने नोभेम्बर महिनामा बेलायतको जीडीपी ०.२ प्रतिशत मात्र बढ्ने आँकलन गरेका थिए ।
ओएनएसका अर्थशास्त्री ग्रान्ट फिज्नरले नोभेम्बरमा खुद्रा बिक्री, कार र कम्प्युटर गेमका कारण बेलायतको अर्थतन्त्र बढेको बताए ।
उता वस्तुको उत्पादन भने बेलायतमा नोभेम्बर महिनामा सकारात्मक रहन सकेन । नोभेम्बरसहित बितेको तीन महिनामा उत्पादनमा ०.२ प्रतिशतले ह्रास आएको छ । जसका कारण सन् २०२३ मा बेलायतको अर्थतन्त्र आर्थिक मन्दीमा गएको हुनसक्ने पनि अनुमान गरिएको छ । डिसेम्बर महिनाको तथ्यांक आएपछि मात्र गत वर्षको बेलायतको अर्थतन्त्रको वास्तविक चित्र सार्वजनिक हुनेछ ।