लण्डन । अफगानिस्तानको लडाइँमा दुवै खुट्टा गुमाएका पूर्व गोरखा सैनिक हरिबहादुर बुढामगरले कृतिम खुट्टाको सहारामा विश्वको सर्वोच्च शिखर सगरमाथाको आरोहण गरी इतिहास रचेका छन् ।
नेपालबाट प्रकाशन हुने द हिमालयन टाइम्स दैनिकका अनुसार बुढाले हिजो दिउँसो ३ बजेर १० मिनेट जाँदा सगरमाथाको चुचुरोमा टेक्न सफल भएका हुन् । उनीसँगै अन्य चार जना पनि शिखरमा पुगेको बताइएको छ ।
४३ वर्षीय बुढामगर असम्भव केही छैन र अपाङ्गता भएका व्यक्तिले पनि चाहेको कुरा पूरा गर्न सक्छ भन्ने सन्देश दिन सगरमाथा आरोहण गरेको बताउँछन् । कन्वेरिङ ड्रिम्स एक्सपिडीसन्स नाम दिइएको आरोहण अभियानबाट सगरमाथा आरोहण गरेका बुढामगरले सामाजिक सञ्जालमा पोष्ट गरिएको छोटो भिडियोमा नसोचेको कुरा भयो भनेका छन् ।
सगरमाथाको सफल आरोहण सँगसँगै बुढामगरले घुँडाभन्दा माथिको कृतिम खुट्टाको सहारामा सगरमाथा चढ्ने पहिलो व्यक्ति बनेर विश्व कीर्तिमान पनि राखेका छन् । तथापि यसको आधिकारिक पुष्टि हुन बाँकी छ ।
उनको सगरमाथा आरोहण एचएसटी एडभेन्चरका हरिकृष्ण थापामगरमार्फत भएको थियो । थापा बेलायतको स्पेशल फोर्समा काम गरिसकेका पूर्व गोरखा सैनिक हुन् ।
बुढामगरको जनसम्पर्क कार्यालयले शनिबार जारी गरेको विज्ञप्तिअनुसार चुचुरोमा पुगेपछि बुढामगर ‘हामीले शिखर चुम्यौँ’ भनेर चिच्याएका थिए ।
त्यसपछि सेटेलाइट फोन सम्पर्कमा उनले सगरमाथा आरोहण सोचेभन्दा गाह्रो भएको बताएका छन् । उनले जति लामो समय लागे पनि जति सास्ती भएपनि हामीले शिखरमा पुग्ने लक्ष्यलाई जारी राख्ने र जोड दिने कार्य गर्याैँ भनेका छन् ।
“यदि म शिखरमा पुग्न सक्छु भने सबै जना पुग्न सक्छन् चाहे उनीहरु जस्तोसुकै अपाङ्गता भएको होस् । सबैले सपना पूरा गर्न सक्छन्” उनले भनेका छन् । उनले आरोहणमा सहयोग गर्ने परिवार र सबैलाई सम्झेका छन् । उनीहरुको सहयोग बिना आरोहण सम्भव नहुने पनि बताएका छन् ।
उनले सन् २०१८ मा सगरमाथा चढ्ने योजना बनाएका थिए । तर अहिले सगरमाथा आरोहणको ७० वर्ष पुगेको अवसरमा सगरमाथा आरोहण गर्न पाउँदा विशेष लागेको उनले बताएका छन् ।
उनले आरोहणको उद्देश्य अपाङ्गता बारेको बुझाइलाई परिवर्तन गर्नु र हरेकलाई आफ्नो सपना पूरा गर्न प्रोत्साहित गर्नु रहेको स्मरण गराएका छन् । “जतिसुकै विशाल र चुनौतीपूर्ण तपाईको सपना होस्, उचित मानसिकता भयो भने हरेक चीज सम्भव छ“ उनले भनेका छन् ।
बुढामगरको आरोहणलाई करिब ३० वटा संस्था र करिब ६०० व्यक्तिहरुले सहयोग गरेका छन् भने उनले पाँचवटा च्यारिटीका लागि ८ लाख ८४ हजार ९०० पाउण्ड सहयोग उठाउने लक्ष्य राखेका छन् । उनले सहयोग गर्ने सबैप्रति आभार व्यक्त गरेका छन् ।
बुढामगरले यसअघि नै घुँडाभन्दा माथिको कृतिम खुट्टाको साथमा ६ हजार ४७६ मिटर अग्लो मेरा पिक लगायतका हिमाल चढेर विश्व कीर्तिमान राखिसकेका छन् ।
रोल्पा मिरुलमा बुढाले सन् २०१० मा अफगानिस्ताको हेल्मण्डमा खटिएको बेला दुश्मनको एम्बुसमा परेर दुवै गोडा घुँडाभन्दा माथि गुमाएका छन् । त्यसयता उनी बेलायतमा प्रेरणादायी प्रवचन दिने, साहसिक खेलमा सहभागी हुने, सामाजिक तथा व्यावसायिक कार्यमा सक्रिय छन् ।
