आरके गुरुङको ‘घर त गैरी गाउँ’

काठमाडौँ । दुई दशकदेखि मौलिक गीत संगीतमा शब्द, लय, स्वर र संगीत संयोजन गर्दै आउनु भएका गायक आर के गुरुङले यो पटक भने आफ्नो दर्शक स्रोताहरुको लागि केही फरक शैली गीत लिएर प्रस्तुत भएका छन् ।

१८ वर्षअघि ‘माइली रोधिघरमा सँगै नाचौँला’ बोलको कौराहा मौलिक गीतबाट साँगीतिक क्षेत्रमा प्रवेश गरेका गुरुङले अहिले केही फरक शैलीको लोकदोहोरी गीत ‘घर त गैरी गाउँ’ लिएर आएका छन्। सो गीतमा गुरुङले मीठो स्वर, शब्द र लयका धनी गायक मनोज केसीसँग सहकार्य गरेका छन् ।

गायकद्वय करिब १५ वर्षदेखि साँगीतिक सहकार्य गर्दै आएका छन् । ‘हेर्दैमा राम्रो बागलुङै बजार (सालैजो), ‘बज्यो मादल मायाको गाउँमा’ (झ्याउरे), ‘गल्कोटै गाउँको’ (सालैजो), ‘माइली रोधिघरमा’ (रिमेक), ‘ज्ञानी माया’ (पञ्चेबाजा) र ‘बस है माया’ (सालैजो) जस्ता मीठा मीठा मौलिक भाकाहरु उहाँहरूले स्रोतामाझ पस्किसक्नु भएको छ।

‘घर त गैरी गाउँ’ गीतमा मनोज केसी र अस्मिता अधिकारीको मीठो आवाज रहेको छ । गीतको भिडियोमा निर्देशक दीपेन्द्र तिमल्सिनाले सुन्दर कोरियोग्राफी गरेका छन् । चर्चित कलाकारहरु गणेशमान घले, रमेश थापा, जुना सुन्दास र आयुस्मा कार्कीले गीतमा नाचसँगै अभिनय गरेका छन् ।

म्युजिक भिडियोलाई शिवपुरी राष्ट्रिय निकुन्जको ढाप ताल र प्रकृति रिसोर्टमा छायाँकन गरिएको छ । छायाँकार नवराज उप्रेती र भिडियो सम्पादक विष्णुहरि तिमल्सिनाले भिडियोलाई सुन्दर र चाखलाग्दो बनाएका छन्।