प्रतिनिधिसभाको सभामुखको निर्वाचन माघ ५ गते

काठमाडौँ । प्रतिनिधिसभाको सभामुख पदका लागि माघ ५ गते निर्वाचन हुने भएको छ ।
प्रतिनिधिसभाका ज्येष्ठ सदस्य पशुपति शम्शेर जबराले मंगलबार सो जानकारी दिए । उनले सभामुखको निर्वाचनका लागि सङ्घीय संसद् सचिवालयका महासचिव भरतराज गौतमलाई निर्वाचन अधिकृत तोकेका छन् ।
संविधानमा निर्वाचनपछि प्रतिनिधिसभाको पहिलो बैठक बसेको १५ दिनभित्र सभामुख र उपसभामुखको निर्वाचन गर्नुपर्ने प्रावधान छ ।
मङ्सिर ४ गते सम्पन्न प्रतिनिधिसभा र प्रदेशसभा सदस्य निर्वाचनपछि प्रतिनिधिसभाको पहिलो बैठक हिजो पुस २५ गते बसेको थियो । प्रतिनिधिसभाको अर्को बैठक आगामी माघ ५ गते बिहान ११ बजे बस्नेछ ।