नेपलिज नर्सिङ एसोसिएसन युकेको सदस्यता शुल्कमा आधा छुट

लण्डन । अन्तर्राष्ट्रिय नर्सेज दिवसका अवसरमा नेपलिज नर्सिङ एसोसिएन युकेको सदस्यता शुल्कमा आधा छुट दिइने भएको छ ।
एसोसिएसनकी अध्यक्ष सुनिता थापा गौतमका अनुसार आजदेखि छ महिनाका लागि एसोसिएसनको सदस्यतामा आधा छुट दिने निर्णय गरिएको छ । साथै, नेपालबाट बेलायत आएका नर्सहरुलाई पहिलो वर्ष एसोसिएनको सदस्यता शुल्क मिनाहा गर्ने र हाल बेलायतमा नर्सिङ अध्ययन गरिरहेका नेपाली मूलका विद्यार्थी नर्सहरुलाई पिन नम्बर नपाउञ्जेलसम्म निशुल्क सदस्यता दिइने पनि उनले बताइन् ।
“बेलायतमा नेपाली मूलका नर्सहरु धेरै नै भएको अनुमान छ । उनीहरुलाई धेरैभन्दा धेरै एसोसिएनमा आवद्ध गराउनका लागि सदस्यता शुल्कमा छुट दिने निर्णय गरेका हौँ”, अध्यक्ष गौतमले भनिन् । उनका अनुसार यस योजनाअनुसार सदस्यता लिन चाहनेहरुले Halfpricelifetime कोड उल्लेख गर्नुपर्नेछ ।
एसोसिएसनको सदस्यता शुल्क वार्षिक ९९ पाउण्ड रहेको छ । छुटपछि अब ५० पाउण्ड मात्र तिरे पुग्नेछ ।
एसोसिएसनले बेलायतमा रहेका नेपाली मूलका नर्सहरुलाई सदस्यता लिन अनुरोध गरेको छ साथै डेण्टल नर्सहरुलाई पनि एसोसिएसनमा आवद्ध हुन आग्रह गरेको छ ।
सन् २००८ मा खुलेको नेपलिज नर्सिङ एसोसिएसन युकेले बेलायतमा रहेका नेपाली मूलका नर्सहरुको व्यक्तिगत तथा पेशागत विकासका लागि विभिन्न कार्यक्रमहरु गर्दै आइरहेको छ ।
बेलायतको च्यारिटी कमिसनमा दर्ता भएको एसोसिएनले नर्सहरुको मानसिक स्वास्थ्यका लागि योगा, नृत्य कक्षाहरु पनि गर्दै आएको छ भने मे २९ देखि अब्जेक्टिभ स्ट्रचल क्लिनिकल एक्जामिनेसन (ओस्की) कक्षा पनि सञ्चालन गर्ने भएको छ ।
बेलायतको पब्लिक हेल्थ इङ्ल्याण्डसित समेत राम्रो सम्बन्ध रहेको एसोसिएनले आफ्ना सदस्यहरुका लागि विभिन्न छात्रवृत्ति तथा अवसरहरु समेत उपलब्ध गराउने गरेको छ । “यस्ता अवसरहरु नयाँ सदस्यहरुका लागि उपयोगी हुन सक्छन् । त्यसैले सदस्यता लिइदिन हुन म अनुरोध गर्दछु”, अध्यक्ष गौतमले भनिन् ।

प्रतिक्रिया

सम्बन्धित सामाग्री