लण्डन । गैरआवासीय नेपाली संघ (एनआरएनए) युकेकी निवर्तमान अध्यक्ष श्रीमती पूनम गुरुङ बेलायतमा विहीबार सम्पन्न स्थानीय निर्वाचनमा पराजित भएकी छिन् ।
एनआरएनए युकेको जिम्मेवारी हस्तान्तरण गरे लगत्तै बेजिङस्टोक महिला कञ्जरभेटिभ समितिको अध्यक्ष पदमा गुरुङ नियुक्त भएकी थिइन् ।
उनी यस स्थानीय निर्वाचनमा कञ्जरभेटिभ पार्टीबाट बेजिङस्टोक तथा डीन काउन्सिलको ब्राइटन हिल वडामा उम्मेदवार रहेकी थिइन् । काउन्सिलको पेजमा प्रकाशित निर्वाचन परिणामअनुसार गुरुङ ५३७ मतका साथ तेस्रो स्थानमा रहिन् । सो वडामा लिबरल डेमोक्र्याटिक पार्टीका उम्मेदवार करेन एन्ड्रिया बावेसले ९३७ मत ल्याई विजय हासिल गरेकी छिन् भने उनको निकटतम प्रतिद्वन्द्वी लेबर पार्टीका क्लेयर ओलिभिया फिप्स बनिन् । उनले ५६१ मत पाइन् ।
७ हजार ७४६ मतदाता रहेको सो वडामा २८.६ प्रतिशत मात्र मत खसेको थियो भने ११ मत बदर भएको थियो ।
