बेलारुस युक्रेनमा हुने रुसी सैन्य अभियानमा सरिक नहुने

मिन्स्क । बेलारुसले युक्रेनमा रुसको विशेष सैन्य कारबाहीमा भाग नलिने भएको छ ।
बेलारुसका राष्ट्रपति अलेक्जेन्डर लुकाशेन्कोले बिहीबार एसोसिएटेड प्रेससँगको अन्तर्वार्तामा सो कुरा बताएका छन्।
लुकासेन्कोले बेलारुस शान्तिको पक्षमा रहेको र वर्तमान रुस-युक्रेन सैन्य द्वन्द्वको अन्त्यका लागि बारम्बार आह्वान गरेको पनि बताए। “हामी स्पष्ट रूपमा कुनै पनि युद्ध स्वीकार गर्दैनौं। हामीले युद्ध नहोस् भनेर अहिले सबै गरिरहेका छौं,” लुकाशेन्कोले एपीलाई भने । उनले आफ्नो देशले युक्रेन र रुसबीच वार्ता अघि बढाएको पनि स्मरण गराए ।
युक्रेनले आफ्नो भूमिमा शत्रुता भइरहेको भए पनि वार्तामा चासो नदेखाउनुको कारण वाशिङटनको नीति रहेको उनले आरोप लगाए ।
राष्ट्रपतिले सङ्कटमा आणविक हतियारको प्रयोग अस्वीकार्य भएको बताएका छन् ।
बेलारुसी राष्ट्रपतिका अनुसार उनी र रुसी राष्ट्रपति भ्लादिमिर पुटिनबीच स्वतन्त्र राष्ट्रका प्रमुखबीच हुन सक्ने सबैभन्दा राम्रो सम्बन्ध छ।