लण्डन । बेलायतको रोजगार क्षेत्र कोभिड महामारी पूर्वको अवस्थामा फर्किएको छ ।
कोभिडको पछिल्लो ओमिक्रोन भेरियन्टको तीव्र संक्रमणको बाबजूद पनि बेलायतमा डिसेम्बर महिनामा १ लाख ८४ हजार मानिसहरुले नयाँ जागिर पाएका छन् । नोभेम्बर महिनाको तुलनामा डिसेम्बर महिनामा बेलायतमा रोजगारीको संख्या ०.६ प्रतिशतले बढेको छ ।
बेलायतकाे राष्ट्रिय तथ्याङ्क कार्यालय (ओएनएस) ले मंगलबार सार्वजनिक गरेको तथ्याङ्कअनुसार कोभिड महामारी शुरु हुनु पूर्व सन् २०२० को फेब्रुअरीको तुलनामा १.४ प्रतिशत बढीले अहिले रोजगारी पाएका छन् ।
कार्यालयका अनुसार नोभेम्बर महिनामा बेलायतको बेरोजगारी ४.१ प्रतिशतमा झरेको थियो । अर्थशास्त्रीहरुले भने सो अवधिमा बेरोजगारी दर ४.२ प्रतिशतमा मात्र झर्ने पूर्वानुमान गरेका थिए ।
बेलायतका अर्थमन्त्री ऋषि सुनकले, ‘आजको तथ्याङ्कले बेलायतको रोजगार क्षेत्र बढिरहेको प्रमाणित गर्छ । डिसेम्बर महिनामा जागिर पाउनेहरुको संख्या बढिरहेको र जागिर गुमाउनेहरुको संख्या सन् २००६ यताको थोरै देखिएको छ’ भनेका छन् ।
कोभिड महामारी शुरु भएयता रोजगारीको सुरक्षा गर्न ‘फर्लो’ योजना ल्याएको थियो । सो योजना सेप्टेम्बर २०२१ मा सकिए पनि त्यसको असर रोजगार क्षेत्रमा खासै नपरेको ओएनएसले जनाएको छ ।
ओएनएसले जागिरेको संख्या बढे पनि बेलायतमा बढ्दो मुद्रास्फितिलाई सुहाउने गरीको कामदारको तलवमानमा वृद्धि भने नभएको बताएको छ । ओएनएसका अनुसार नोभेम्बर बेलायतको मुद्रास्फिति दश वर्षयताकै उच्च ५.१ प्रतिशतमा पुगेको थियो।
बैँक अफ इङ्ल्याण्डले अप्रिल महिनामा मुद्रास्फिति ३० वर्षकै उच्च ६ प्रतिशतमा पुग्ने अनुमान गरेको छ ।
