देउवा र खाँड श्रीमान-श्रीमती नै केन्द्रीय समितिमा

काठमाडौं । नेपाली कांग्रसको १४औं महाधिवेशनअन्तर्गत पदाधिकारीसहित सम्पूर्ण पदको नतिजा सार्वजनिक भएको छ । बिहीबार मतगणना सकिएर साँझ सार्वजनिक मतपरिणाममा केही चर्चित हस्ती पराजित भएका छन् भने केही शीर्ष नेता पत्नीसहित निर्वाचित भएका छन् ।

जसमा सभापति तथा प्रधानमन्त्री शेरबहादुर देउवाकै पत्नी आरजु राणा देउवाको नाम आउँछ । छोरा जयवीरलाईसमेत राजनीतिमा अवतरण गराइसकेका बेला देउवाकी पत्नी आरजु यसपाली महिलातर्फ केन्द्रीय सदस्यमा चुनाव लडिन् ।

खुला महिलातर्फ उनले २ हजार ५३६ मतसहित निर्वाचित भइन् ।

यसैगरी गृहमन्त्री एवं खुला केन्द्रीय सदस्यमा सर्वाधिक तेस्रो मत ल्याएर निर्वाचित बालकृष्ण खाँणकी पत्नीले पनि चुनावमा जित हासिल गरेकी छन् । नेपाल महिला संघकी महासचिवसमेत रहेकी गृहमन्त्री पत्नी मञ्जु खाँणले महिला खस आर्यतर्फ सर्वाधिक मत ल्याएर प्रथम स्थानमा निर्वाचित भइन् ।

यस्तै, कांग्रेसका प्रभावशाली नेता स्वर्गीय खुमबहादुर खड्काका पत्नी शीला खड्का पनि भूगोलतर्फ लुम्बिनीबाट २ हजार ६७३ मतसहित निर्वाचित भइन् । खुमबहादुरको निधनपछि शीला र उनका छोरा अनुराग कांग्रेसको राजनीतिमा होमिएका छन् । शीलालाई सभापति देउवाले खुमबहादुर खड्काको निधनपछि केन्द्रीय सदस्य मनोनित गरेका थिए ।

यस्तै बाग्लुङका नेता हरि खड्काकी धर्मपत्नी चम्पा खड्का पनि केन्द्रीय सदस्यमा विजयी भएकी छिन् । हरि खड्का बाग्लुङका सांसद थिए उनको सडक दुर्घटनामा निधन भएपछि चम्पा राजनीतिमा आएकी हुन् ।

पूर्वराष्ट्रपति डा. रामवरण यादवका छोरा डा. चन्द्रमोहन यादव कांग्रेसको खुला मधेसी केन्द्रीय सदस्य पदमा २१३८ मतसहित विजयी भएका छन् । रामवरणकी भतिजी एवं वर्तमान राष्ट्रपति विद्यादेवी भण्डारीकी सम्धिनी किरण यादव भने पराजित भएकी छन् ।