एनआरएनए युकेको निर्वाचन कार्यक्रम प्रकाशित, मनोनयन १५ र १६ जुलाईमा

लण्डन । गैरआवासीय नेपाली संघ (एनआरएनए) युकेको नयाँ कार्यसमिति चयनका लागि निर्वाचन कार्यक्रम प्रकाशन भएको छ ।

निर्वाचन समितिको शनिबार सम्पन्न बैठकले पारित गरी सो कार्यक्रम प्रकाशन गरिएको हो ।

निर्वाचन कार्यक्रमअनुसार जुलाई ११ साँझ ५ बजेभित्र एनआरएनए युकेको वेभसाइट www.nrnauk.org मा पहिलो मतदाता नामावली प्रकाशन हुनेछ र सो नामावलीमाथि दाबीविरोधका लागि जुलाई १२ साँझ ५ बजेसम्मको समय दिइएको छ । दाबीबिरोध निर्वाचन समितिको इमेल [email protected] मा पठाउनु पर्नेछ । यसरी आएका दाबीविरोधमाथि छानविन गरी जुलाई १४ साँझ ५ बजेभित्र अन्तिम मतदाता नामावली प्रकाशन गरिने छ ।

नयाँ कार्यसमितिमा उम्मेदवार बन्न चाहनेहरुले १५ जुलाईदेखि उम्मेदवारी मनोनयन गर्न सक्नेछन् । मनोनयनको म्याद १६ जुलाई साँझ ५ बजेसम्म तोकिएको छ । उम्मेदवारी मनोनयन एक जना प्रस्तावक र एक जना समर्थकको हस्ताक्षरसहितको मनोनयन फाराम भरेर निर्वाचन समितिको इमेल [email protected] मा पठाउनु पर्नेछ । मनोनयन फारामका साथमा उम्मेदवारी शुल्क एनआरएनए युकेको बैङ्क खाता NRNA UK Welfare A/C No 02158825 Sort Code 40-09-26 HSBC Bank मा जम्मा गर्नुपर्नेछ । उम्मेदवारको प्रथम नामावली प्रकाशन जुलाई १८ साँझ ५ बजे एनआरएनए युकेको वेभसाइटमा गरिनेछ ।

उम्मेदवारको नामावलीमाथि दाबीविरोध गर्नका लागि जुलाई १९ दिउँसो १ बजेसम्मको समय दिइएको छ । दाबीविरोध इमेलमार्फत गर्नपर्नेछ । यसरी परेका दाबी विरोधमाथि छानबिन गरी जुलाई २० साँझ ५ बजे उम्मेदवारको अन्तिम नामावली प्रकाशन गरनेछ । मतदान जुलाई ३१ बिहान ००.०० बजेदेखि राति २३.५९ बजेसम्म अनलाइनबाट गर्न सकिनेछ । मतपरिणाम र घोषणा सभा अगष्ट १ तारिखका दिन भर्चुअलरुपमा हुने बताइएको छ ।

राष्ट्रिय समन्वय समितिको अध्यक्ष पदमा उम्मेदवार हुनका लागि १ हजार ५०० पाउण्ड, उपाध्यक्ष र महासचिव पदका लागि ११०० पाउण्ड, सचिव, कोषाध्यक्ष, सहकोषाध्यक्ष, महिला संयोजक र युवा संयोजकका लागि ८५० पाउण्ड तोकिएको छ भने सदस्यहरुका लागि ४५० पाउण्ड  ।

राष्ट्रिय समन्वय समितिको अध्यक्ष हुन एक कार्यकाल काम गरिसकेको हुनुपर्नेछ । यस्तै राजनीतिक, जातिय, धार्मिक संस्थाको कार्यकारी पदमा रहेका व्यक्तिले राष्ट्रिय समन्वय समितिको कुनै पनि पदमा उम्मेदवारी दिन पाउने छैनन् ।

वेल्स, स्कटल्याण्ड, नर्दन आयरल्याण्ड र इङल्याण्ड राज्यबाट राष्ट्रिय समन्वय समितको उपाध्यक्ष निर्वाचित हुन सम्बन्धित राज्यमा एक वर्ष बसोबास गरेको हुनुपर्नेछ ।

बेलायतभित्रका चारवटै राज्यपरिषदका विभिन्न पदहरु अध्यक्ष पदका लागि ४५० पाउण्ड, उपाध्यक्ष पदका लागि ३०० पाउण्ड, सचिव र कोषाध्यक्ष पदका लागि २०० पाउण्ड, सहकोषाध्यक्ष र सहसचिव पदका लागि १५० पाउण्ड तथा सदस्य पदका लागि १०० पाउण्ड उम्मेदवारी शुल्क कायम गरिएको छ ।

यस्तै अन्तर्राष्ट्रिय समन्वय समितिका लागि उम्मेदवार बन्न चाहनेले १ हजार ५०० पाउण्ड उम्मेदवारी शुल्क तिर्नपर्नेछ भने महाधिवेसन प्रतिनिधि बन्न चाहनेले ४० पाउण्ड । तर महाधवेसन प्रतिनिधिका लागि कसरी निर्वाचन हुन्छ भन्ने बारेमा भने निर्वाचन समितिको सूचनामा कुनै उल्लेख छैन ।