लण्डन । बेलायतमा यस वर्षको पहिलो तीन महिनामा बेरोजगारी दर केही घटेको छ ।
अफिस फर न्याशनल स्ट्याटिटिक्सका अनुसार गत मार्चमा बेरोजगारी दर ४.८ प्रतिशत रहेको थियो । जबकि फेब्रुअरीमा सो दर ४.९ प्रतिशत रहेको थियो ।
लकडाउनको अवधिकै सो तथ्यांकले रोजगार क्षेत्रमा सुधारको प्रारम्भिक संकेतहरु देखिएको अफिस फर न्याशनल स्ट्याटिटिक्सले जनाएको छ ।
मार्च र अप्रिलको बीचमा करिब ९७ हजार मानिसहरुले नयाँ काम पाएको पनि बताइएको छ । यद्यपि रोजगार क्षेत्र अझै महामारी पूर्वको अवस्था भन्दा ७ लाख ७२ हजारले कम रहेको छ ।
बेलायतमा अहिले कामको अवसर बितेको एक वर्षकै उच्च रहेको पनि बताइएको छ ।
अफिस फर न्याशनल स्ट्याटिटिक्सका आर्थिक तथ्यांक निर्देशक ड्यारन मोर्गानले रोजगार क्षेत्र नोभेम्बरदेखि नै सुध्रँदै आएकोमा अप्रिलमा बलियो सुधार भएको बताए । तर महामारीपूर्वको अवस्थाभन्दा अझै करिब ७ लाख ७५ हजार कम मानिसहरुले रोजगारी पाएको पनि उनले प्रष्ट पारे ।
बेलायतका अर्थमन्त्री ऋषि सुनकले महामारीका बेला सरकारले जागिर सुरक्षा गरेकोमा त्यसको असर अहिले देखिन शुरु गरेको बताएका छन् । हरेक जागिर बचाउन नसकिए पनि महामारीको शुरुवातमा जागिर गुमाउने अनुमान गरिएको संख्यामा २० लाख कम्ती मानिसहरुको जागिर बचाउन सकिएको पनि उनले बताए ।
बेलायतमा लकडाउन सोमबारदेखि करिब सकिएकाले यहाँको अर्थतन्त्र पुन चलायमान हुने अपेक्षा गरिएको छ ।
