लण्डन । एनआरएनए युकेले कोरोना भाइरसविरुद्धको लडाइँमा खोप नै दीर्घकालिन समाधान भएकाले नेपालमा खोप उपलब्ध गराउन बेलायत सरकारसित पहल गर्ने भएको छ ।
अध्यक्ष पूनम गुरुङको अध्यक्षतामा आइतबार बसेको बैठकले साेकाे लागि बेलायतमा रहेका नेपालीमूलका तथा गैरनेपाली काउन्सिलर, मेयर, सांसदहरुसित सहकार्य र सम्वाद तथा नेपाली दुताबास लण्डनसित मिलेर पहल गर्ने निर्णय गरेको महासचिव फडिन्द्र भट्टराईले बताए ।
बैठकले यससम्बन्धमा संयोजन गर्न अध्यक्ष गुरुङलाई जिम्मा दिएको छ ।
यस्तै बैठकले एनआरएनए आइसिसीले नेपालमा कोभिड १९ को समस्यामा तत्काल सहयोग पुग्ने गरी १०० थान अक्सिजन कन्सन्ट्रेट मेसिन खरिद गर्न लागेकोमा एनआरएनए युकले ५ लाख रुपियाँ सहयोग गर्ने निर्णय गरेको छ ।
नेपालमा कोरोना भाइरसको संक्रमण तीव्र बन्दै गएकोमा नेपालमा आ-आफ्नो क्षेत्र, समूहलाई सहयोग गर्न एनआरएनए युकेले बेलायतमा रहेका नेपाली समुदायसित अपील गरेको छ । त्यस्तो सहयोगमा समन्वय गर्न चाहेमा एनआरएनए युके स्वास्थ्य विभागमार्फत समन्वय गर्न सकिने पनि बताइएको छ ।
बैठकले नेपालमा कोरोना संक्रमितहरुलाई लक्षीत गरेर बेलायतका चिकित्सकहरुबाट स्वास्थ्य सम्बन्धी चेतना वा परामर्श कार्यक्रम गर्न स्वास्थ्य समितिका संयोजक सुनिल साहलाई जिम्मा दिएको छ ।
