लन्डन । बेलायतको राजधानी लण्डनभित्रको स्थानीय काउन्सिलमा नेपाली मूलका पूर्व गोरखा सैनिक मेयरमा निर्वाचित भएका छन् ।
पश्चिम लण्डनमा रहेको हाउन्स्लो बरो काउन्सिलको मेयरमा विष्णुबहादुर गुरुङ निर्वाचित भएका हुन् ।
गोरखा सौरपानी फुन्चोक पुर्ख्यौली घर भएका गुरुङ सो काउन्सिलमा दोस्रोपटक काउन्सिलरका रुपमा कार्यरत रहँदै आएका छन् भने उनले यसअघि सोही काउन्सिलको उपमेयरको जिम्मेवारी पनि निर्वाह गरिसकेका छन् । उनी लेबोर पार्टीबाट निर्वाचित काउन्सिलर हुन् ।
उनको कार्यकाल एक वर्षको हुनेछ ।
बेलायतमा लण्डन, म्यानचेष्टर, लिभरपुल, ब्रिष्टोल लगायतका मुख्य शहरहरुमा मेयर शक्तिशाली हुन्छन् भने अन्य स्थानीय काउन्सिलहरुमा मेयरको जिम्मेवारी ‘सेरेमोनियल’ रहने गर्दछ ।
बेलायतमा यसअघि नेपाली मूलका शंकर गैरे र डा जगन्नाथ शर्मा स्थानीय काउन्सिलको मेयरमा निर्वाचित भएका थिए । तर लण्डनभित्रको बरो काउन्सिलहरुमा भने पहिलोपटक नेपाली मूलका मेयर बनेका छन् ।
लण्डनभित्रकै अर्को बरो बार्नेटमा पनि नेपाली मूलका पूर्व गोरखा सैनिक लक्ष्यबहादुर गुरुङ उपमेयर छन् ।
