लन्डन । गैरआवासीय नेपाली संघ (एनआरएनए) यूकेको नयाँ कार्यसमितिको निर्वाचन जुलाई ३१ मा हुने भएको छ ।
शुक्रबार साँझ सुरु भएर शनिवार विहानसम्म चलेको कार्यसमितिको भर्चुअल पूर्ण बैठकले नवौं कार्यसमितिको निर्वाचन जुलाई ३१ लाई तय गरेको एनआरएनए यूके महासचिव फडिन्द्र भट्टराईले जानकारी दिएका हुन ।
अध्यक्ष पुनम गुरुङको अध्यक्षतामा सम्पन्न बैठकले निर्वाचन समितिको प्रमुख आयुक्तमा पूर्व अध्यक्ष महेन्द्र कंडेललाई सर्वसम्मतिले ल्याएको छ । निर्वाचन समितिमा सदस्य पछि थप गर्ने सहमति भएको छ । नयाँ सदस्यता आवेदन गर्ने सदस्यहरुको सदस्यता प्रमाणिकरणको जिम्मा अध्यक्ष पुनम गुरुङ, महासचिव भट्टराई र कोषाध्यक्ष तेजेन्द्र रोका मगरलाई दिने निर्णय पनि गरेको छ । यसअघि अध्यक्ष गुरुङले मात्रै गर्दै आएकोमा चार उपाध्यक्षहरुले युरोप संयोजक गुहारेका थिए ।
गत अप्रिल १ देखि जुन १० सम्मको समयसीमा दिएर एमआइएस प्रणालीबाट पञ्जीकृत सदस्यता आवेदन आव्हान गरिसकेको छ ।
