एनआरएनए पूर्व अध्यक्ष भट्ट बने ओशो सन्यासी

लण्डन । गैरआवासीय नेपाली संघका निवर्तमान अध्यक्ष भवन भट्टले आध्यात्मिक जागरणको नयाँ जीवन सुरु गरेका छन् ।

ओशो तपोवन नागार्जुन काठमाडौंमा तीन दिने आवासीय शिविर सम्पन्न गरेपछि स्वामी आनन्द अरुणले भट्टलाई दीक्षा दिएका छन् । उनलाई ‘स्वामी आनन्ददेव’ को रुपमा ओशो सन्यासीको नामाकरण गरिएको छ ।

ध्यान साधनाको नयाँ जीवन शुरु गरेका ओशो सन्यासी पुरुषहरुलाई स्वामी र महिलाहरुलाई माँ भनेर सम्बोधन गर्ने गरिन्छ ।

भट्टले योग र ध्यानको प्रयोगबाट आफूलाई रुपान्तरण गर्ने प्रयास केही समय अघिबाट गरेको र अब दीक्षित भएर त्यस मार्गलाई अझ फराकिलो बनाउने प्रयास गरेको बताएका छन् । आफूले विभिन्न कोणबाट जीवनको गहिरो अनुभव संगालिसकेको र अतृप्त चाहना धेरै नभएकोले सन्यासको यात्रा सहज हुने विश्वाश गरेको उनले थपे  । रोमान्टिक स्वभावका भट्ट ”हँसिबा खेलिबा धरिबा ध्यानम” ( हाँस्दै खेल्दै ध्यानमा उत्रिनुस ) को कबीर वाणीको धरातलीय यथार्थ ओशोको ध्यान बिधिमा रहेकोले आफूलाई ओशो सन्यासी बन्न प्रेरणा मिलेको बताउँछन् ।