लण्डन । अन्तराष्ट्रिय जर्नलहरू तथा अन्तर्राष्ट्रिय कविता प्रतियोगिताहरूमा अनुदित नेपाली कविताको उपस्थिति न्यून रहेकोमा त्यसलाई बढाउनका लागि स्वतन्त्र अनुवाद नामक संस्थाको स्थापना गरिएको छ ।
बेलायतको स्कटल्याण्डमा बसोबासरत नविन क्षेत्री र मुकुल दाहालले सो सेवाको शुरुवात गरेका हुन् । सो संस्थाले नेपाली कविता र कथाहरूको स्तरीय अनुवादको सेवा उपलब्ध गराउने संस्थापकद्वयले जानकारी दिए । तर हाललाई उपन्यास विधा भने समेटिएको छैन ।
बेलायतमा स्थापित संस्था भए पनि वेबसाइटमार्फत संसारका जुनसुकै स्थानबाट सम्पर्क गर्न सकिने भएकाले आफूहरुको सेवा कुनै स्थान विशेषमा सीमित नरहेको संस्थापकहरुले प्रष्ट पारेका छन् ।
नेपालबाट अनुवाद गराउन चाहनेहरूको लागि छुट्टै अनुवाद शुल्क रहने बताइएको छ ।
संस्थामा सम्पर्क गर्नु परे र संस्थाले पुर्याउने सेवाहरूको विस्तृत जानकारी आवस्यक परे सेवाग्राहीहरूले संस्थाको वेबसाइटमार्फत त्यस्तो जानकारी प्राप्त गर्न सक्नेछन् ।
संस्थाको वेबसाइट http://independenttranslation.co.uk. रहेको छ ।
संस्थाले नेपाली साहित्यका साथसाथै प्रशासनिक र कानुनी कागजातहरूको अनुवाद गर्ने र हिन्दी लगायत अन्य भाषाहरू पनि सेवा दिने बताएको छ ।
