काठमाडौँ । कोरोना भाइरसका कारण वैदेशिक रोजगारीमा रहेका १० जना नेपाली श्रमिकले ज्यान गुमाएका छन् ।
वैदेशिक रोजगार बोर्डका अनुसार वैदेशिक रोजगारीका सिलसिलामा विभिन्न देशमा गएकामध्ये नेपाल सरकारले लकडाउन सुरु गरेदेखि २०७ जना श्रमिकको विदेशमा मृत्यु भएको छ र जसमा १० जनाको कोरोना भाइरसका कारण मृत्यु भएको छ।
बोर्डका कार्यकारी निर्देशक राजनप्रसाद श्रेष्ठका अनुसार हालसम्ममा संयुक्त अरब इमिरेट्स (यूएई)मा पाँच जना, साउदी अरेबियामा तीन जना, कतार र टर्कीमा एक/एक जना गरी १० जनाको कोभिड १९ कारण ज्यान गएको हो ।
कार्यकारी निर्देशक श्रेष्ठले कोभिड १९ कारण ज्यान गुमाएका सबैको परिवारसँग सहमति लिएर सम्बन्धित देशमा नै शवको अन्त्येष्टि गरिएको जानकारी दिए ।
कोभिडका कारण देश लकडाउनमा गएपछि विदेशमा ज्यान गएका नेपालीको शव अहिलेलाई नेपाल ल्याउन सम्भव छैन । अन्तर्राष्ट्रिय मापदण्डअनुसार नै कोभिडका कारण ज्यान गुमाउनेको शव नेपाल ल्याउन कठिन हुने र गन्तव्य देशले पनि नदिने भएकाले गन्तव्य देशमै अन्त्येष्टि गर्नुको विकल्प नरहेको श्रेष्ठले बताए ।
बन्दाबन्दीले विदेशमा १९७ शव अलपत्र
बोर्डका अनुसार कोरोना भाइरसका कारण बन्दाबन्दीले गर्दा अन्तर्राष्ट्रिय उडान बन्द हुँदा १९७ जनाको शव उतै रोकिएको छ । यस अवधिमा मलेसियामा ४४ जना, कुवेतमा ११ जना, बहराइन र दक्षिण कोरियामा तीन/तीन जना, सेलेल्स, ओमानमा एक/एक जनाको शव त्यतिकै पडेको छ । यस्तै युएइमा ४१, साउदीमा ४९, कतारमा ४० जनाको शव नेपाल आउन प्रतीक्षारतछ ।
