हाम्रो प्रेम

दिल दिन्छु भन्छौ
ज्यान पनि तिम्रै लागि हौ भन्छौ
शब्दकोष र शब्द चयनकै भण्डार हौ तिमी
खै के के दिन्छु भन्छौ तिमी ।

प्रिय, तिम्रो त्यो स्वच्छ प्रेमको मुल्यांकन गर्ने
दुस्साहस कसरी गरूं र म?

जीवनको यो उत्तरार्धमा
शब्द रचना तिम्रै लागि हो भन्छौ
रंगीन शब्द तिम्रै पोल्टोमा हाल्छु भन्छौ
तिमीलाई के थाहा तिम्रा लिखित यी शब्द
अनि ती रंगको प्रभाव यो मनमा ।

तिम्रो त्यो रसमय शब्दको मुल्यांकन गर्ने
दुस्साहस कसरी गरूं र म?

जीवनको यो उत्तरार्धमा
प्रेम ‘अनकण्डिशनल’ छ भन्छौ तिमी
हो र? भन्दै उल्टै प्रश्न गर्छु म
तिमी मौनतामा मुस्कुराउंछौ र म तिम्रो मुस्कानमा हराउंछु

तिम्रो त्यो भावपूर्ण मुस्कानको मुल्यांकन गर्ने
दुष्साहस कसरी गरुं र म?

मेरो प्रिय सुन भन्दै
तिमी हाम्रो मिलनको विश्लेषण गर्छौ
म नियालेर तिमीलाई हेर्छु
अनि भावविभोर भएर सुन्छु
अनि तिमी भन्छौ
दुई शरीरको मिलन होइन यो हाम्रो प्रेम
दुई आत्माको संगम हो है हाम्रो प्रेम
म र तिमीको कसी पार गरेर हामी हुनु हो हाम्रो प्रेम
एउटा राम्रो सर्जकले कलात्मक ढंगले लेखेको सृजनाको बौद्धिक समालोचना हो हाम्रो प्रेम ।

मेरी प्रिय तिमी,
तिम्रो मुस्कानमा मैले स्वान्तसुखाय पाउनु
हो पो है हाम्रो प्रेम
है हाम्रो प्रेम ।

२४ जनवरी २०२०
लन्डन