प्रधानमन्त्री बोरिस जोन्सन
लन्डन । बेलायती संसदले आउंदो जनवरी ३१ तारिख भित्र ब्रिटेनले युरोपेली संघ (ईयू) छाड्नु पर्ने योजनालाई अनुमोदन गरेको छ ।
ब्रिटिश संसदको तल्लो सदन हाउस अफ कमन्समा शुक्रबार भएको मतदानमा ३५८ सांसदहरुले ईयूबाट बाहिरिने सहमति सम्बन्धि विधेयकको पक्षमा मतदान गरे भने २३४ जना विपक्षमा उभिए ।
उक्त विधेयकमा ब्रिटेन ईयूबाट बाहिरिने संक्रमण अवधि लम्ब्याउन नपाउने प्रावधान पनि छ ।
प्रधानमन्त्री बोरिस जोन्सनले अब ब्रिटेन ईयूबाट बाहिरिने दिशामा एक कदम नजिक पुगेको बताएका छन् ।
मुख्य विपक्षी दल लेबरका अधिकांश सांसदले विधेयकको विपक्षमा मतदान गरेका थिए तर सोही दलका ६ जना सांसदले भने विधेयकको पक्षमा मतदान गरेको बीबीसीले जनाएको छ ।
ब्रिटेनमा गत डिसेम्बर १२ मा भएको चुनावमा सत्तारुढ कन्जरभेटिभले स्पष्ट बहुमत ल्याएपछि यो विधेयक सजिलै पारित हुने ठानिएको छ ।
क्रिसमस बिदालगत्तै संसद बैठक शुरु भएपछि आउंदो ७, ८ र ९ जनवरीमा उक्त विधेयक माथि छलफल हुने गरि मिति तोकिएको छ ।
बेलायती संसदले ब्रेक्जिट विधेयक पारित गरेपछि ३१ जनवरी २०२० सम्म बेलायत ईयूबाट अलग हुने पक्का छ । सन् २०२०, ३१ डिसेम्बरसम्म ईयूसंग संक्रमणकालिन ब्यवस्था लागू भएसम्म सीमा, अध्ययागमन आदिमा कुनै परिवर्तन आउने छैन् । अबको महत्वपूर्ण काम ईयूसंग एक वर्षभित्र ब्यापारिक सन्धि गर्नु हो, जुन त्यति सहज नभएको विश्लेषकहरुको भनाइ छ ।
बेलायत जनवरी ३१ तारिखभित्र ईयूबाट अलग्गिने तयारीमा छ । बेलायत सन् १९७३ मा २८ युरापेली देशहरुको संघ युरोपियन युनियनमा आवद्ध भएको थियो । ईयूसंग पारपाचुके गर्ने बेलायत पहिलो देश हुनेछ ।
सन् २०१६ जुनमा भएको जनमतसंग्रहमा बेलायती जनताले ईयूबाट अलग्गिने पक्षमा मत दिएपछि शुरु भएको ब्रेक्जिट मुद्दा अझै टुंगिएको छैन् । यो २९ मार्च २०१९ मा अलग्गिनुपर्ने तालिका थियो । निवर्तमान प्रधानमन्त्री टेरेजा मेको ब्रेक्जिट डिल संसदले पटक पटक अस्वीकार गरिदिएपछि ३१ अक्टोबर २०१९ सम्म सारियो बहिगर्मन म्याद । गत जनवरीदेखि मार्चसम्म बेलायती संसदले ब्रेक्जिट डिल तीनपटकसम्म अस्वीकार गरिदियो । यसै कारण तत्कालिन प्रधानमन्त्री टेरेजा मे राजिनामा दिन वाध्य भइन् र बोरिस जोन्सन दलको नेता चुनिएर प्रधानमन्त्री भए । तर, उनी पनि थपिएको समयसीमाभित्र ब्रेक्जिट मुद्दा पार लगाउन असफल भएपछि नयां जनादेशका लागि मध्यावधि आमनिर्वाचनमा होमिए । उक्त निर्वाचनमा कन्जरभेटिभले ६५० निर्वाचन क्षेत्रमा ३६५ सिट जितेर स्पष्ट बहुमत ल्याउन सफल भएको छ ।
प्रधानमन्त्रीले सैनिकहरुलाई ख्वाए क्रिसमस भोज
प्रधानमन्त्री जोन्सनले नेटो मिसनमा गएका ब्रिटिश सैनिकहरुलाई क्रिसमस दिवाभोज ख्वाएका छन् । इस्टोनिया पुगेका प्रधानमन्त्रीले टालिननजिक टापा सैनिक बेसक्याम्पमा रहेका सैनिकहरुलाई क्रिसमसको शुभकामना पनि दिएको बीबीसीले जनाएको छ । इस्टोनियामा ८५० बेलायती सैनिक खटिएका छन् जुन युरोपमा सबैभन्दा ठूलो संख्या हो ।
