राजदूतले दिए मिस नेपाललाई बधाइ

लन्डन । मिस नेपाल अनुस्का श्रेष्ठलाई लन्डनस्थित नेपाली राजदूत डा. दुर्गाबहादुर सुवेदीले बधाइ तथा शुभकामना दिएका छन् । आफ्ना आमा बाबुका साथ लन्डन बस्ने अन्तिम दिन शुक्रबार दूतावास गएकी अनुष्काले 
त्यहांको भेट अविष्मरणीय र प्रेरणादायी भएको उल्लेख गरेकी छन् । उनले नेपाल सरकारको बेलायतमा प्रतिनिधित्वको पनि प्रशंसा गरेकी छन् ।

भेटमा राजदूतसंग नेपाली कला संस्कृति जगेर्नामा युवाहरुको भूमिकालगायत अन्य धेरै सवालमा कुराकानी भएको अनुष्काले बताइन् ।

गत साता सम्पन्न मिस वल्र्ड २०१९ प्रतियोगितामा टप १२ सम्म पुगेकी अनुष्काले ‘ब्युटी वीथ अ पर्पोज’ र ‘मल्टिमिडिया’ अवार्ड जितेपछि उनलाई बधाइको ओइरो छ ।

२३ वर्षीया श्रेष्ठले सोसियल मिडियामा अत्यधिक इन्गेजमेन्ट, लाइक कमेन्ट अनि सेयर पर्याप्त भएका कारण मल्टिमिडिया अवार्ड पाएकी थिइन् भने काठमाडौंदेखि ७० किलोमिटर टाढा हेलम्बु क्षेत्रस्थित सोल्सिङ गाउंमा ग्रामीण विकास र सशक्तिकरणका लागि काम गरिरहेको उनको प्रोजेक्टले ‘ब्युटी वीथ अ पर्पोज’ अवार्ड दिलाएको थियो ।

अनुष्काले १४० घरधुरी रहेको सोल्सिङमा शिक्षा, स्वास्थ्य र जिविकोपार्जनका लागि उक्त कम्युनिटी प्रोजेक्ट रोजेकी छन् ।

‘हेड टु हेड च्यालेन्ज’ राउण्ड टु जितेर उनी ‘टप ४०’ मा सिधै पुगेकी थिइन् । अनुष्काले हाउस अफ लर्डस् र अक्सफोर्ड युनियनमा भएका वहसमा आफूलाई अब्बल पनि देखाइन् ।

अनुष्कालाई ब्रिस्टोल नेपाली सोसाइटीले पनि बधाइसहित सम्मान गरेको छ । तर, बेलायतका नेपाली अनि संघसंस्थाको प्रतिनिधित्व गर्ने छाता संस्था भनिने एनआरएनए यूकेले भने उनलाई न बधाइ दियो न भेटघाट अनि सम्मान ।

नेपाल फर्किएपछि उनले आफ्नो प्रोजेक्टमा समय दिने बताएकी छन् ।