लन्डन । किरात राई यायोक्खा बेलायतको आयोजनामा साकेला उधौली भब्यताका साथ सम्पन्न भएको छ ।
धामी (नाक्छुङ) द्वारा पानी पुजा, चुला (सुप्तुलुङ) पुजा सम्पन्न गरेपछि साकेला पुज्ने गरिन्छ । बेलायतमा भएका चार जना धामी (नाक्छुङ) हरुलाई किरात राई यायोक्खा बेलायत अध्यक्ष कल्पना राईलो रितपूर्वक धामी बांध्ने प्रस्ताव राखेकी थिइन् । धामीहरुले प्रस्ताव स्वीकार गरे पश्चात खोटाङ जिल्लाका पूर्व सभापति तथा सल्लाहकार रत्न राई र संरक्षक दिलबहादुर राईले फेटा लगाई धामीहरुलाई संस्कारगत शिर उभाएका थिए ।
किरातीहरूमाझ यो चाड आफ्नो जनजीवन र जीवनयापनसंग नजिक जोडिएकाले खुब महत्व छ । आफूले लगाएको सम्पूर्ण बाली सप्रियोस्, कसैलाई पनि दुःख बिमारले नसताओस् भन्ने प्रार्थना आफ्नो पितृ पुर्खाहरूलाई गर्दै प्रत्येक वर्ष मंसिर पूर्णिमादेखि उधौली र बैशाख पूर्णिमादेखि उभौली मनाउने परम्परा छ ।
धामीहरु किताबशेर राई र टाइटेक्स् फल्माछा आफ्नै घरमा पानीको पूजा सम्पन्न गरी साकेला पुज्न उपस्थित भएका थिए । किरात राईहरुको आफ्नै भूमि ग्याम्बललेनमा चुलाको प्रतिक ‘सेउली गाडी’ पूजा गरेपछि साकेला थानमा गई उधौली पूजा गरिएको थियो ।
राईहरु एक आपसमा उधौलीको शुभकामना आदानप्रदान गर्दै ढोल र झ्याम्टाको तालमा साकेला नाचेका थिए । अन्तमा चुलाको प्रतिक गाडेको सेउलीमा धामीहरुले विधि र संस्कारगत पूजा सकेपछि उधौली सम्पन्न भएको थियो ।
