माल्टामा पहिलोपटक नेपाली कन्सर्ट

लन्डन । ब्रिटेनको पूर्व उपनिवेश रहेको युरोपेली मुलुक माल्टामा पहिलोपटक वृहत नेपाली कन्सर्ट भएको छ । एनआरएनए माल्टाले गत शनिबार गायकद्वय हिमाल सागर र आशिष सचिनलाई झिकाएर कार्यक्रम गरेको हो । एनआरएनए माल्टा गैर आवासीय नेपाली 
संघको ८० औं शाखा हो ।

दीपावली र छठ शुभकामना आदानप्रदान गर्न आयोजित उक्त सांगीतिक कार्यक्रममा दर्शक उपस्थिति सोचेभन्दा उल्लेख्य रहेको एनआरएनए माल्टाका अध्यक्ष राजु अर्याल बाबुले जनाए । माल्टामा रहेका नेपालीलाई एकतावद्ध गर्ने उद्देश्यले कार्यक्रम गरिएको एनआरएनए माल्टाका सदस्य रहरमान तामाङ बताउंछन् ।

कार्यक्रममा प्रमुख अतिथि थिए एनआरएनए 
केन्द्रीय सल्लाहकार सोम सापकोटा । कार्यक्रम संयोजन पूर्ण कोइरालाले गरेका हुन् ।

माल्टामा अहिले नेपाली जनसंख्या बढ्दै गएको छ । वर्क परमिट र अध्ययनका लागि नेपालीको आकर्षण बढेको हो । विशेषगरि हस्पिटालिटी क्षेत्रमा नेपालीको माग बढि छ । क्लिनर, वेटर, अकाउन्टेन्ट क्लर्क र हाउस किपिङ काममा नेपाली संलग्न रहेका र मासिक न्यूनतम कमाइ करिब ७ सय ३५ युरो हुने लन्डनस्थित नेपाली दूतावासले जनाएको छ । लन्डनस्थित नेपाली दूतावासले नै कामदार माग प्रमाणिकरण गर्छ ।

दूतावासले माल्टाबाट विदेशी पर्यटक भित्रयाउन पनि पहल शुरु गरेको छ । केही महिनाअघिमात्र माल्टा एवं बेलायतका लागि नेपाली राजदूत डा. दुर्गाबहादुर सुवेदीको अध्यक्षतामा ‘नेपाल भ्रमण वर्ष २०२० पर्यटन प्रवर्धन समिति माल्टा’ गठन गरिएको छ ।

प्रतिक्रिया

सम्बन्धित सामाग्री