एनआरएनए अध्यक्ष भवन भट्टले संस्थाभित्र ब्वाँसा छन् भनेपछि…

लन्डन । गैआवासीय नेपाली संघ (एनआरएनए) अध्यक्ष भवन भट्टले संस्थाभित्रै ब्वाँसाहरु रहेको धारणा सार्वजनिक गरेपछि तरंग उत्पन्न भएको छ ।

एनआरएनए आईसिसी अध्यक्ष निर्वाचित भएको झण्डै दुई बर्षपछि भट्टले संस्थाभित्र ब्वाँसाहरु रहेको धारणा सामाजिक संजाल फेसवुक मार्फत सार्वजनिक गरेका हुन् । ८० मुलुकमा फैलिएको गैरआवासीय नेपाली संघको नेतृत्वकर्ताले नाम नलिइकन ब्वाँसाहरु रहेको भन्ने टिप्पणीले पूर्व अध्यक्षहरु माथि औंला ठडिएको छ । ‘एनआरएनएको छाला ओढेर बसेको लोभी स्यालको बुई चढेर स्वार्थको रडाको मच्चाउने ब्वाँसाहरुको कमी छैन् । विगतमा झैं तिमीहरुको स्वार्थले काम गर्ने छैन्’ उनले फेसवुक लाइभमा भने । 

हाल एनआरएनएभित्र शक्तिशाली देखिएका पूर्व अध्यक्ष जीवा लामिछाने माथि भट्टले सांकेतिक आरोप लगाएको अड्कल काटिएको छ । यद्यपि यस बिषयमा मुख खोलेका छैनन् ।

गत बर्ष नेपालमा भएको विज्ञ सम्मेलनदेखि नै अध्यक्ष भट्ट र पूर्व अध्यक्ष जीवा लामिछानेबीच मनमुटाव रहदै आएको छ । उक्त मनमुटावकै कारण नेपालमा बसेको पछिल्लो कार्यसमिति बैठकमा लामिछानेलाई एनआरएनए आईसिसी अध्यक्ष भट्टले बस्न दिएका थिएनन् ।

गत साता फेसबुकमार्फत लाइभ गर्दै भट्टले आगामी नेतृत्वका लागि उम्मेदवारी नदिने घोषणा गरेपनि व्याक सिटमा बसेको भने जनाएका थिए । आफूले स्वतस्फूर्त र एक संस्कार निर्माणका लागि यो निर्णय लिएको भन्दै भट्टले पावर र लोभी संस्कारलाई चिर्नु जरुरी रहेको बताए ।

उनले भने, ‘एनआरएनएको बसमा म चालक सिटबाट पछाडिको सिटमा सरेको मात्रै हुँ, बसबाट ओर्लेको होइन । यो यात्रा सहज छैन र म कमजोरलाई यो नेतृत्व हस्तान्तरण गर्दिन पनि, म खोजिरहनेछु म पछिको साधन स्रोत सम्पन्न व्यक्तित्व ।’

गैर आवासीय नेपाली संघको ९ औं विश्व सम्मेलन आगामी अक्टोबर १३ देखि १६ सम्म काठमाडौंमा तय भएको छ ।