‘क्याप्टेन’ लिएर भुवन-अनमोल बेलायत आउंदै, ६ अप्रिलमा प्रिमियर

लन्डन । आफ्नो पछिल्लो चलचित्र ‘क्याप्टेन’ लिएर सदाबहार नायक तथा निर्माता भुवन केसी एवं उनका छोरा नायक अनमोल केसी बेलायत आउने भएका छन् । सपन इन्टरटेन्मेन्ट लि. यूकेले आगामी ६ अप्रिलमा गर्न लागेको ‘क्याप्टेन’ को यूके प्रिमियर शोका लागि केसी बाबु छोरा बेलायत आउन लागेका हुन् ।

सपन इन्टरटेन्मेन्ट लि. यूकेका निर्देशक सपन राईले प्रिन्सेस हल अल्डरसटमा प्रिमियर शो हुन लागेको जानकारी दिंदै उक्त सुपरहिट फिल्म हेरेर भरपुर मनोरन्जन लिन निमन्त्रणा गरेका छन् । उक्त अवसरमा भुवन अनमोलसंग प्रत्यक्ष साक्षात्कार गर्न र फोटो खिचाउन पाइने पनि राईले बताए । ‘बेलायतवासी नेपालीलाई गुणस्तरिय चलचित्र देखाउने उद्देश्य पनि मेरो हो’, राईले भने, ‘अचेल दर्शकहरु उत्कृष्ट सिनेमातिर आकर्षित भएकाले पनि जस्तो पायो त्यस्तो फिल्म ल्याएर यहां चल्दैन् ।’

करिब अढाइ वर्ष अघि पनि भुवन केसी आफू निर्देशित पहिलो चलचित्र ‘ड्रिम्स’ को रेड कार्पेट प्रिमियर शोका लागि छोरा अनमोलका साथ बेलायत आएका थिए ।

‘क्याप्टेन’ नेपालमा अहिले तेश्रो सातामा सफलताका साथ प्रदर्शन भइरहेको छ । बुधबारमात्र प्रधानमन्त्री केपी शर्मा ओलीले परिवारसहित कमलपोखरीस्थित सिटी सेन्टरमा गएर ‘क्याप्टेन’ हेरेका थिए । फागु पूर्णिमाको सन्दर्भ पारेर आफ्ना पिता र पत्नीसाथ प्रधानमन्त्री ओली ‘क्याप्टेन’ हेर्न गएका हुन् ।

भुवन केसीद्वारा निर्माण गरिएको उक्त चलचित्र फुटबल खेलसंग आधारित छ । नायक अनमोल केसीको मुख्य भूमिका रहेको उक्त चलचित्रले खेल क्षेत्रमा देखिएका विकृति र विसंगति अन्त्यका लागि डटेर निरन्तर लागेमा सफलता सम्भव छ भन्ने सन्देश दिएको छ ।