बेलायती प्रधानमन्त्री थेरेसा मे विश्वासको मत जित्न सफल

लन्डन । बेलायती प्रधानमन्त्री थेरेसा मे आफ्नो पार्टीको संसदीय दलमा विश्वासको मत जित्न सफल भएकी छिन् ।
बुधबार साँझ सत्तारुढ कञ्जरभेटिभ पार्टीको संसदीय दलमा भएको मतदानमा मेले २०० सांसदको मत पाइन् भने विपक्षमा ११७ मत परेको थियो ।

मत परिणाम घोषणा गर्दै सत्तारुढ कञ्जरभेटिभ पार्टीको ब्याकवेञ्चर समूह १९२२ कमिटीका अध्यक्ष सर ग्राहम ब्राडीले प्रधानमन्त्री मेप्रति पार्टीका सांसदहरुको विश्वास रहेको घोषणा गरे ।

युरोपियन युनियनबाट बेलायतलाई बाहिर लैजाने सम्बन्धमा प्रधानमन्त्री मेले प्रस्तुत गरेको प्रस्तावप्रति सत्तारुढ दलका सांसदहरुमा असन्तुष्टि बढेपछि प्रधानमन्त्री मेले विश्वासको मत लिनु परेको हो । बुधबारको परिणामपछि आगामी एक वर्षसम्म मेले विश्वासको मत लिनुपर्ने छैन् ।

सांसदहरुको विश्वास जित्न मेले बुधबार दिउँसो आगामी निर्वाचनमा आफू नउठ्ने घोषणा गरेकी थिइन् ।

पार्टीभित्र विश्वासको मत जिते पनि उनले अघि सारेको युरोपियन युनियनबाट बेलायत बाहिरिने प्रस्ताव (ब्रेक्जिट डिल) बारे भने बेलायती संसदमा मतदान हुन बाँकी नै छ । मंगलबारका लागि संसदमा मतदानको कार्यक्रम राखिए पनि अन्तिम समयमा सो स्थगित गरिएको थियो ।