बुधबार, असोज १४ २०७७ | Wed, September 30, 2020
नेपालको समय: ०८:५९ | UK Time: 04:14

गोल्डेनसीपमा जम्यो सपन रुबीको जोडी

वीनेपाली
२०७५ भदौ १६ गते ०:५९

लन्डन । बेलायतमा चिरपरिचित गायक, इभेन्ट अर्गनाइजर एवं साउण्ड इन्जिनियर सपनकुमार राई र नेपालबाट आएकी गायिका रुबी गौलीले साउथ हयारोस्थित गोल्डेनसीप रेष्टुरेन्टमा प्रत्येक शुक्रबार प्रस्तुत गरेको गायन लोकप्रिय बन्दै गएको छ । उनीहरुले शोमा प्रस्तुत गर्ने पुराना नयां हिन्दी र नेपाली गीत सुन्न दुबै समुदायका ग्राहक बढेका हुन् । दर्शकहरुको डिमाण्ड अनुसार किशोरकुमार देखि मुकेश, रफी, उदित लगायत सदाबहार श्रष्टाहरुको गीत प्रस्तुत गर्छन् उनीहरु ।

विगत २५ वर्षदेखि गायनमा आवद्ध पोखरा निवासी रुबी महिना दिन अघिमात्र बेलायत आएकी हुन् । उनले लन्डन, अल्डरसट लगायत ठाउंमा आफ्नो कला प्रस्तुत गरिसकेकी छन् । हिन्दी र नेपाली गायनमा उनको दख्खल छ । ‘बेलायत बसाइ अविष्मरणीय र रमाइलो भइरहेको छ’, रुबीले अनुभव सुनाइन्, ‘बेलायतका नेपालीको न्यानो मायाले अझ बसाइ सुःखद भएको छ ।’

पोखराको चर्चित गजल रेष्टुरेन्ट ‘ओपन हाउस’ मा बिगत २० वर्षदेखि निरन्तर गाउन थालेकी रुबी मेलोडियस आवाजका कारण पोखरामात्र होइन्, सबैतिर चर्चित छन् । उनका विभिन्न एल्बममा गीतसमेत रेकर्ड भइसकेका छन् भने कयौं स्टेज कार्यक्रम गरिसकिन् ।

दुई वर्ष अघि स्थापित गायिकाहरुको मात्र संस्था ‘हार्मोनीः दि मोर्डन संगस्ट्रेस अफ पोखरा’ को सदस्य पनि छन् रुबी । अझै ५ महिना बेलायत बसेर नेपाली दर्शक श्रोतालाई मनोरन्जन दिने सोचमा छिन् उनी । तर, डिमाण्ड कायमै रहे बसाइ बिस्तार गर्ने उनले बताइन् ।

सपन इन्टरेटनमेन्ट लिमिटेडले आर्टिष्ट वर्क परमिटमा बोलाएको हो रुबीलाई । उनले बेलायतमा पहिलो अवसर दिएकामा सपन इन्टरेटनमेन्ट लिमिटेडका निर्देशक सपनकुमार राईप्रति आभार समेत व्यक्त गरिन् । विगत २५ वर्षदेखि कार्यक्रम आयोजना र गायनमा समर्पित सपनले सयौं कलाकार बेलायत ल्याइसकेका छ्न् भने उनको नृत्य प्रतियोगिता ‘यूके डान्स अफ’ को तेश्रो संस्करण यही अक्टोबर १४ मा हुने तयारीमा छ ।

गोल्डेनसीपमा इण्डियन र नेपाली दुबै खालका ग्राहक आउने भएकाले ति ग्राहकको सन्तुष्टिका लागि नियमित शो राखिएको रेष्टुरेन्टका सञ्चालक देब गुरुङले बताए ।

गुरुङले नेपालबाट आउने हरेक कलाकारलाई आफ्नो रेष्टुरेन्टमा गाउन अवसर दिंदै आएका छन् । नेपाली कला, संस्कृति जगेर्ना आफ्नो उद्देश्य भएको गुरुङले बताए ।

तस्बिर- शिव भण्डारी 

प्रतिक्रिया

सम्बन्धित सामाग्री

फेसबुक